د ملګروملتونو د امنیت شورا  په ملګرو ملتونو کې د فلسطین د بشپړ غړیتوب پر مسودې رای اچونه کوي.

د ملګروملتونو د امنیت شورا  په ملګرو ملتونو کې د فلسطین د بشپړ غړیتوب پر مسودې رای اچونه کوي.

په ملګرو ملتونو کې د فلسطین دایمي استازي په خپل ټولنیزې میډیا  پاڼې له لارې په خپور کړي یوه پیغام کې ویلي چې د پریکړه لیک مسوده د الجزایر لخوا د عربي ډلې په استازیتوب چمتو شوې وه.

د پریکړه لیک په متن کې د ملګروملتونو عمومي اسمبلې ته وړاندیز شوی چې فلسطین ته دې د ملګرو ملتونو سازمان  بشپړ غړیتوب ورکړ شي.

تمه کیږي چې د اپریل په ۱۸ نیټه د ملګرو ملتونو په امنیت شورا کې د وزیرانو په کچه په غونډه کې  د فلسطین د بشپړ غړیتوب  پر مسودې رای اچونه وشي.

خو  امریکا ادارې وار د مخه  ددې مسودې  د ویټو سیګنال ورکړی دی.

په ملګرو ملتونو کې د امریکا د دایمي استازي مرستیال رابرټ ووډ ویلي، چې په دې اړه د امریکا دریځ نه دی بدل شوی او زیاته کړې ده ، "موږ فکر کوو چې د فلسطين د بشپړ غړيتوب موضوع يوه داسې مسله ده چې بايد د اسرائيلو او فلسطينيانو ترمنځ خبرې پرې وشي."

د مسودې د تصویب لپاره، د ملګروملتونو د امنیت شورا  د ۱۵غړو د ۵ دایمي غړیو رایه حتمي دي. همداشان  د ۱۵ غړیو نه لږ تر لږه د ۹ غړیو رایو ته اړتیا ده.

که د امنیت  شورا مثبته پریکړه وکړي، موضوع د ملګرو ملتونو عمومي غونډې ته راجع کیږي. د ملګرو ملتونو د ۱۹۳ غړو په عمومي غونډه کې د غړیتوب د تصویب لپاره باید دوه پر درېیمه رایې ترلاسه شي.

فلسطین په ۲۰۱۱ کال کې په ملګرو ملتونو کې د بشپړ غړیتوب غوښتنه کړې وه، خو دغه غوښتنلیک د ملګرو ملتونو په امنیت شورا کې لازم ملاتړ ترلاسه نه کړ. فلسطین په ۲۰۱۲ کال کې د «څارونکي حیثیت» ترلاسه کړ.

په ملګرو ملتونو کې د فلسطین دایمي استازي ریاض منصور د اپریل په دویمه په خپل بیان کې د ملګرو ملتونو سرمنشي انتونیو ګوتریش ته یو لیک استولی او غوښتنه یې کړې چې د غړیتوب پر غوښتنلیکونو دې له سره غور وشي.

ګوټریش د اپریل په دریمه د ملګرو ملتونو امنیت شورا ته یو لیک هم ولیکه او د فلسطین غوښتنه یې په اجنډا کې واچوله.

د ملګرو ملتونو امنیت شورا د اپریل په اتمه د فلسطین غوښتنه "د نویو غړو د داخلیدو کمیټې" ته واستوله.

کمیټې چې ټاکل شوې وه د غړیتوب په اړه د ملګرو ملتونو امنیت شورا ته ځواب ورکړي، اعلان وکړ چې د دوو غونډو وروسته کومې موافقې ته ندي رسیدلي.