په شمالي وزیرستان کې د یوې خیریه بڼسټ ۴ تنه ښځینه کارکوونکې ووژل شوې

د پاکستان په شمال لویدیځ کې په شمالي وزیرستان کې  د میر علي په کلي کې پرون دوشنبه د یوې مرستندویه ټولنې د کارکوونکو پر موټر وسله وال برید شوی دی.

پدې برید کې د مرستندویه ټولنې ۴ تنه ښځینه مرستندویانې او د هغوې موټر چلوونکي ژوند د لاسه ورکړی دی.

پولیسو ویلي دي چې دا موټر په شمالي وزیرستان کې فعالیت کوونکي د ښځینه ظرفیتونو د لوړوالي او ودې یوې مرستندویه ټولنې اړوند وو. پدې پيښه کې یواځې یوه ښځه ژوندۍ ژغورل شوې او په سیمه کې نږدې یو کور ته پناه وړې ده .

برید کوونکي د برید نه وروسته تښتیدلي دي.

د پاکستان د بشري حقونو سازمان دا برید په کلکه توګه غندلی دی.