ortaklar zix kawipi

hörmetlik radiyo anglighuchilar! ilker tashqin teripidin teyyarlanghan «türkiyening rayonlargha xas tizimgha élinghan mehsulatliri» namliq sehipimizning bu heptilik sanida, «ortaklar zix kawipi» ni tonushturimiz.

ortaklar zix kawipining türkiyening rayonlargha xas mehsulatliri tizimlikige kirgüzülgen waqti: 23.11.2020

****** ********* ******

türkiyening ege déngizi rayonidiki aydin wilayitining gérmanjik nahiyesige qarashliq ortaklar yézisi özining ismi qoyulghan zix kawipi bilen tonilidu. ortaklar zix kawipi gérmanjik nahiyelik hökümetning iltimasi bilen 2020-yili türkiyening rayonlargha xas mehsulatliri tizimlikige kirgüzülgen idi. rayonning muhim tömür yol we tashyolliri tutishidighan doqmushlarning biri bolghan ortaklar yézisi kawapchiliq ishini deslepte olturaq rayonning otturisidin ötidighan tömür yol etrapigha merkezleshken halda bashlighan bolup, aylandurup sétish bilen mulazimet qilinghan bu kawapchiliq waqitning ötüshige egiship yol boyidiki réstoranlarning birdinbir tamiqigha aylanghan. ortaklar zix kawipining uzunluqi 15 santimétir,  kengliki yérim santimétir  kélidu. yaghsiz ushshaq toghralghan kala göshi bilen teyyarlinidu. uchi pichaq bilen késip ötkürleshtürülgen qomuch zixqa ötküzülidu. andin kawapdanda otun kömüri bilen pishirilidu. bu kawap yaghsiz kala göshi ushshaq toghrilip, bir nechche kün dem yigüzülgendin kéyin yerlik kishilerning tili boyiche «bir qushqach yutalaydighan chongluqta» késilishi bilen meshhur. zix kawipi kawapdangha qoyulushtin ilgiri, qomuch zixning uchigha kichik toghralghan qoyning quyruq yéghi ötküzülidu. zixqa kala göshi we quyruq yéghidin bashqa köktat ötküzülmeydu. ortaklar zix kawipi üchün kichik gösh parchiliri ishlitilidighan bolghachqa yuqiri otta nahayiti téz pishidu we méhmanlargha téz mulazimet qilghili bolidu. kawapdanda pishurulghandin kéyin piyaz, samsaq, pemidur bilen tuz, qizilmuch, qaramuch we zire qatarliq qoshumche tétitqular birlikte sunilidu.