türkiye néfitqa alaqidar nishanigha yuqiri yönilishlik özgertish kirgüzdi

türkiye awazi radiyosi: türkiye jumhuriyet tarixidiki néfit ishlepchiqirish rékortini buzdi. kündilik ishlepchiqirish miqdari 100 ming warildin éship ketti؛ bu musapide gabarda bayqalghan néfit nahayiti muhim rol oynidi. shéhit aybüke yalchin we shéhit esma chewik néfitlikining kündilik ishlepchiqirish miqdari 40 ming warildin éship ketti. shundaq qilip, türkiye bu yil üchinchi ay toshushtin burun 2024-yilliq néfit ishlepchiqirish nishanigha yetti. türkiyening 2024 – yilliq yéngi nishani aldi bilen 150 ming warilgha, andin 200 ming warilgha yétish.

türkiye néfit hessidarchiliq shirkitining mölcheriche, shéhit aybüke yalchin néfitlikidiki yéngi bayqalghan omumiy néfit zapisi texminen 1 milyard waril, ishlepchiqirishqa bolidighan  néfit zapisi texminen 600 milyon waril iken.

gerche shirnaq ishlepchiqirishta muhim orungha ige bolsimu, emma mezkur néfitliklerning qisqa muddet ichide kéngeytilishi kütülmekte؛ aldi bilen, hakkari we wanda nahayiti qisqa waqit ichide yéngi burghilash paaliyetliri bashlinidu. shéhit kenji léyténant ismail jan aqdéngiz rayonida zor miqdarda néfit zapisi barliqi mölcherlenmekte. burghilashlarning 2500 métir bilen 4500 métir chongqurluqlirigha merkezlishidighanliqi tekitlenmekte.

uzun muddettin qarighanda, 14 wilayettiki 18 jayda néfit charlash paaliyiti bashlinidu؛ bu wilayetler tertipi boyiche wan, hakkari, ghaziantep, antalya, chanaqqele, shanliurfa, zonguldaq, diyarbakir, bartin, qarabük, kastamonu, elazigh, edirne, qehrimanmarash we kilis qatarliqlar.

néfit ishlepchiqirish miqdarining éshishigha egiship, türkiyening deslepte néfit éhtiyajining %20ni yerlik menbelerdin qandurushi, buning nöwettiki hésabat qizil reqimige xatime bérishtiki intayin ijabiy qedem bolidighanliqi tekitlenmekte. otturigha qoyulushiche, bu yéngi bayqashlarning türkiye iqtisadigha qoshidighan töhpisi 3 milyard dollardin ashidiken.

gabargha néfit turuba liniyesi yatquzulmaqta...

türkiye nöwette rayondiki  néfitni quruqluq arqiliq toshuwatqan bolsimu, lékin, gabar we rayondiki bashqa néfitliklerdin chiqirilghan néfitlerni asasiy liniyege toshush üchün turuba yatquzush xizmetlirini jiddiy shekilde dawamlashturmaqta.

gabardin «botash»ning idil békitigiche sozulidighan xam néfit turuba yoli qurulushining yérimgha yéqini alliqachan tamamlandi. mezkur néfit idil békitidin jeyhan we dörtyol istansilirigha yetküzülidu. bu arqiliq néfitning téximu qolay éksport qilinishining yoli échilidu. elwette, türkiyening néfit sahesidiki nishanliri quruqluqtiki néfitlikler bilenla cheklenmeydu.

türkiyening töt burghilash paraxoti déngizlardiki charlash paaliyetlirini üzlüksiz dawamlaturmaqta. fatih, yawuz we qanuni qatarliq üch burghilash paraxoti qara déngizda, abdulhemidxan burghilash paraxoti bolsa, aqdéngizda charlash we burghilash paaliyetlirini élip barmaqta.