shimaliy koréye charlighuchi bashqurulidighan bomba sinaq qildi
shimaliy koréye bir herbiy manéwir dairiside töt istratégiyelik charlighuchi bashqurulidighan bombini muweppeqiyetlik sinaq qilghanliqini jakarlidi.
türkiye awazi radiyosi xewiri: shimaliy koréye birleshken döletler teshkilati xewpsizlik kéngishining qararliri we xelqaraliq émbargolargha qarimay, yadro qoralliri, bashqurulidighan bomba yasash we tereqqiy qildurush paaliyetlirini dawamlashturmaqta.
arqa – arqidin ballistik bashqurulidighan bomba sinaqlirini élip bérip, koréye yérim arili we etrapida bixeterlik endishilirini kücheytiwatqan shimaliy koréye, bu qétim istratégiyelik charlighuchi bashqurulidighan bomba sinaq qildi.
shimaliy koréye tünügün (23-féwral) birherbiy manéwir dairiside, kimchayék shehiridin yapon déngizigha qarap 4 dane «Hwasal-2» namliq istratégiyelik charlighuchi bashqurulidighan bomba qoyup berdi.
bashqurulidighan bombilarning aldin békitilgen nishanlargha muweppeqiyetlik tegkenliki eskertildi, hemde sinaq arqiliq istratégiyelik charlighuchi bashqurulidighan bomba qisimlirining heriket iqtidarining kücheytilgenliki qeyt qilindi.
bultur 37 dane bashqurulidighan bomba siniqi élip barghan shimaliy koréye, yéngi yildimu bashqurulidighan bomba pilanini dawamlashturghanidi hemde bu yilning bashliridin étibaren üch ballistik bashqurulidighan bomba siniqi élip barghanidi.
piyongyangning rayonda jiddiylikni ewj alduruwetken sinaqliri amérika qoshma ishtatliri, jenubiy koréye we yaponiye qatarliq xelqara jemiyetning qattiq naraziliqini qozghighanidi.
