ghezzede israiliyening qetliamlirida ölgenlerning sani 35 ming 303 ke yetti

türkiye awazi radiyosi xewiri: ghezzediki pelestin sehiye ministirliqi teripidin élan qilghan bayanatta, israiliyening uda 224 kündin buyan ghezze rayonida dawamlashturuwatqan qetliamliri heqqide melumat bérildi.

bayanatta, israiliye armiyesining yéqinqi 24 saet ichide ghezzening oxshimighan rayonlirida yürgüzgen 4 qétimliq qetliamliri dawamida yene 31 pelestinlikning hayatidin ayrilghanliqi we 56 pelestinlikning yarilanghanliqi bayan qilindi.

israiliyening 7-öktebirdin bashlap ghezze rayonida dawamlashturuwatqan qetliamlirida qaza qilghanlar sanining 35 ming 303 ke, yarilanghanlar sanining 79 ming 261 ge yetkenliki eskertildi.

birleshken döletler teshkilati israiliyening hujumliri astidiki ghezze rayonida yéqinqi 10 kün ichide 700 mingdin artuq pelestinlikning mejburiy köchürüwétilgenlikini uqturdi.

birleshken döletler teshkilati kishilik hoquq komitéti pelestin ishliri ishxanisining ammiwi ortaqlishish tor béti X sehipiside élan qilinghan  bayanatida, israiliyening hujumliri we «tarqaqlashturush» agahlandurushliri sewebidin, balilar , yashanghanlar we méyiplarni öz ichige alghan ghezzening jenubida 600 mingdin, shimalida bolsa  100 mingdin artuq pelestinlikning sergerdanliq hayatqa mehkum bolghanliqi tekitlinip mundaq déyildi:

«israiliye küchliri öy – makanliridin ayrilip sergerdanliq hayatqa mehkum bolup qalghan pelestinliklerni xeterge ittirishni toxtitishi, buning ornigha ularning asasliq éhtiyajlirini qandurushi, insanperwerlik yardem buyumliri we bashqa turmush lazimetliklirining ghezzege kirishi hem tarqitilishigha qulayliq yaritip bérishi kérek.»