türkiye xelqi kéche – kündüz wetenni qoghdimaqta

türkiye awazi radiyosi xewiri: pütkül türkiye xelqi fethullahchi térrorluq teshkilati unsurlirining 15 – iyul herbiy isyan urunushigha naraziliq bildürüsh bilen bir waqitta, memliketning herqaysi jaylirida türkiye bayriqini lepildetken halda meydanlargha seldek éqip, wetenni qoghdimaqta.

jumhur reis rejep tayyip erdoghan fethullahchi térrorluq teshkilati unsurlirining herbiy isyan urunushidin kéyinla: «eziz xelqimge shundaq chaqiriqta bolimenki, meydanlargha kélinglar, meydanlarda bulargha eng yaxshi jawabni béreyli, ularning bu urunushining muweppeqiyetke érishishige ishenmeymen. chünki tarixtin buyan héchqandaq bir herbiy - siyasiy özgirish ghelibe qilalighan emes» teriqiside xelqqe chaqiriq qilghan, türkiye xelqimu erdoghanning bu chaqiriqigha qizghin awaz qoshup, edirnedin haqqarigha qeder memliketning herqaysi bolung puchqaqliridin meydanlargha chiqip, shenbe, yekshenbe, seyshenbe we charshenbe künliridikige oxshashla peyshenbe künidin kéyinmu sahelerge seldek aqmaqta؛ démokratiye bayriqini égiz kötürüp, enqerediki qizilay meydanini öz ichige alghan barliq meydanlarda weten xainlirigha lenet yaghdurmaqta. meydanlarda yangrighan tekbir sadaliri we weten söygüsi mezmun qilinghan xelq naxshiliri hemme yaqni lerzige salmaqta.  xelqning qolliridiki türkiye bayraqliri tebietning hösnige hösin qoshmaqta. istanbul qatarliq sheherlerde keng xelq ammisi weten xainlirigha bolghan ghezep – nepritini yégane yürek halitide ipadilimekte. oxshimighan meydanlardin pütkül jahangha türkiye xelqining wetenni qoghdash yolida héchnémidin ayanmaydighanliqidin ibaret mislisiz weten söygüsi mezmun qilinghan signallar bérilmekte.

kojaeli, bursa, edirne, sakarya, chanaqqele, yalowa, qiriqqale we tekirdaghdimu qanche on milyonlighan xelq meydanlargha chiqip, wetenni qoghdash yolidiki meydanini namayen qilmaqta.