amstérdamda israiliyege qarshi 15 ming kishilik namayish ötküzüldi
gollandiyening paytexti amstérdamda texminen 15 ming kishi naqba (chong apet) gha we israiliyening ghezzediki hujumigha qarshi namayish ötküzdi.
türkiye awazi radiyosi xewiri: paytext amistérdamning dam meydanida pelestinni qollighuchi nurghunlighan teshkilatlar teripidin ortaq uyushturulghan namayishqa texminen 15 ming kishi qatnashti.
namayishchilargha xitab qilghan nutuq sözligüchiler ghezzege qiliniwatqan hujumlargha qarimastin, amérika we gherb hökümetlirining israiliyeni qollighanliqini tenqid qildi we urushning axirlashturulishi üchün xelqara jamaetchilikning heriketke ötüshini kütüwatqanliqini tilgha aldi.
nutuq sözligüchiler saqchilarning 6 - mayda amistérdam unwérsititida bashlanghan namayishqa qarshi zorawanliqinimu tenqid qilip, pikir erkinliki we namayish hoquqining tosalghugha uchrawatqanliqini bildürdi.
nutuq sözligüchiler 1948 - yili israiliyening qurulushini qollighan xelqara jamaetchilikning shuningdin tartip bügünge qeder pelestinliklerning bashtin kechürgen pajielirige jawabkar ikenlikini tekitlidi.
dam meydanigha toplanghan gurruppa nutuqtin kéyin, nurghun sayahet nuqtiliri jaylashqan sheher merkizidin ötüp, muzéylar meydanigha yürüsh qildi.
namayishchilar «zulum menggü dawamlashmaydu, israiliye choqum meghlup bolidu», «deryadin déngizghiche pelestin azad bolidu», «hazir derhal urush toxtitinglar!», «irqiy qirghinchiliqni toxtitinglar!», «pelestinde irqiy qirghinchiliq yüz bériwatidu» dep yézilghan lozinkilarni kötürüp yürüsh qildi.
pelestin bayriqimu échilghan namayishta «pelestinge erkinlik!», «nomussiz rutté! qoliring qanliq» we «israiliye bombardiman qilmaqta, gollandiye pulini tölimekte» dégendek shoarlar towlandi.
namayishchilar namayish jeryanida israiliyeni qollaydighanliqini jakarlighan amérika qehwe zenjiri <starbakis> tarmiqidin ötüsh jeryanida «israiliyeni bayqut qilinglar!» we «nomus qilinglar!» dep shoarlarni towlidi.
