erdoghan: shiwétsiyening türkiyege qoyghan qoral émbargosini bir chetke qayrip qoyalmaymiz
jumhur reis rejep tayyip erdoghan enqerening, shiwétsiyening türkiyege qoyghan qoral émbargosini bir chetke qayrip qoyalmaydighanliqini bildürdi.
türkiye awazi radiyosi xewiri: jumhur reis erdoghan gölchük paraxot zawuti qomandanliq merkizide ötküzülgen murasimda söz qilip, türkiyening yéngi tiptiki su asti paraxotlirining téxnikiliq alahidilikining kishini tesirlendüridighanliqigha isharet qilip ötti we sözini dawamlashturup: «bu yildin bashlap, biz her yili bir su asti paraxotimizni mulazimetke sélish arqiliq 2027 – yilighiche 6 su asti paraxotimizni déngiz armiyemizning qorallirigha qatarigha sepleymiz» dédi.
bu döletning ezeldin bedel tölimey turup birer pursetke érishelmigenlikini, özlirining intayin japaliq küresh qiliwatqanliqini otturigha qoyghan erdoghan: «daésh chégradiki wilayetlirimizge rakétamiyotlarni ishlitip hujum qiliwatqan künlerde, hawa mudapie sistémisimiz chuwulup élip kétildi. bizge pulgha sétip bérilmigen qorallar, daéshqa qarshi küresh dégen bahane bilen qoli qanliq térrorluq teshkilati (p k k) gha yük mashiniliri bilen yetküzüp bérildi. türkiye térrorluq karidori hiylisi bilen muhasirege élinmaqchi boldi. biz dost dep bilidighan döletlerning xiyanetliri we ittipaqdash dep qaraydighan döletlerning hiyle-mikirlirige qarimay, térrorluqqa qarshi utuq qazanduq. türkiye mudapie éhtiyajini qandurush we 40 yilliq térrorluqqa qarshi turush kürishide ittipaqdashliridin kütken qollashqa érishelmidi» dégenlerni qeyt qildi.
u yene, shiwétsiyening shimaliy atlantik ehdi teshkilati — natogha eza bolush iltimasi heqqide toxtilip: «bizshiwétsiyening bizge qoyghan qoral émbargosini bir chetke qayrip qoyalmaymiz, buning eqilge muwapiq izahatimu yoq. natoda oynaydighan rolimizning éniq bolushigha qarimay, biz yenila ittipaqdashlirimiz bilen jazani bikar qilish toghrisida sözlishiwatimiz. bizning teleplirimiz qandurulushi, konkrét qedemler tashlinishi kérek» dédi.
