erdoghan: türkiyeni téz süretlik poyiz qatnishida merkiziy döletke aylandurimiz
jumhur reis rejep tayyip erdoghan türkiyeni téz süretlik poyiz qatnishida merkiziy döletke aylanduridighanliqlirini éytti.
türkiye awazi radiyosi xewiri: jumhur reis erdoghan, qaraman – konya téz süretlik poyiz liniyesini xizmetke kirishtürüsh murasimigha qatnishish üchün yétip barghan konyada xelqke xitab qildi, hemde bu yerde qilghan sözide, qaraman – konya téz süretlik poyiz liniyesini xizmetke kirishtürüsh arqiliq yépyéngi bir dewrni bashlatqanliqlirini, türkiyening hemmila yérige téz süretlik poyiz bilen barghili bolidighan sharaitning yaritilidighanliqini eskertish bilen bir waqitta, türkiyening 10 ming 959 kilométirliq tömür yoli liniyelirini 13 ming 222 kilométirgha yetküzgenliklirini, 1213 kilométirliq adettin tashqiri téz süretlik poyiz we 219 kilométirliq téz süretlik poyiz liniyesini berpa qilghanliqlirini, engliyening paytexti londondin qozghalghan bir poyizning, yawropa we balqan rayonidin ötüp, edirnedin türkiyege kirgendin kéyin, marmaraydin ötüp, anadolugha yétip baralaydighanliqini tekitlep mundaq dédi: «anadoluni bashtin – axir késip ötidighan bu poyiz, qars – tiflis – baku tömür yoli liniyesi arqiliq asiyagha, u yerdin béyjinggha yétip baralaydu. biz mana mushundaq layihege meblegh sélish arqiliq dölitimizni tiransport we qatnashqa teyyar halgha keltürüsh yolida eng halqiliq basquchlardin ötüp kettuq, türkiyeni bashqa köpligen sahelerdikige oxshash téz süretlik poyiz qatnishi we tömür yoli tiransportidimu merkiziy döletke aylandurush iradimiz qetiydur.»
jumhur reis erdoghan, nutiqidin kéyin, konya bilen qaraman otturisidiki musapini qisqartidighan téz süretlik poyizgha olturup, qaramangha qarap yolgha chiqti, qaramangha yétip barghandin kéyin, qaraman - konya téz süretlik poyiz liniyesi we qurulushi tamamlanghan bashqa layihelerning échilish murasimigha qatnashti, hemde bu yerde qilghan sözide, türkiyeni maariptin sehiyegiche, amanliqtin adaletkiche, qatnashtin énérgiyegiche her sahede güllendüridighan sélinmilar arqiliq tereqqiy qilduruwatqanliqlirini tekitlep mundaq dédi: «türkiyeni yéqinqi mezgillerde nurghun jaylarda yüz bériwatqan qalaymiqanchiliq we parchilinish xewpige duchar qilish koyida boluwatqanlarning xiyanetlirini ashkarilaymiz.»
