erdoghan 3 - nöwetlik türkiye - afriqa hemkarliqi bashliqlar yighinida söz qildi

türkiye awazi radiyosi xewiri: istanbulda chaqirilghan 3  - nöwetlik türkiye  - afriqa hemkarliqi bashliqlar yighinining üchinchi küni resmiy kütüwélish murasimi we aile foto – süritige chüshüsh bilen bashlandi.

jumhur reis erdoghan yighinning échilishida qilghan sözide, türk xelqining afriqa xelqi bilen tarixi 9  - esirge tutishidighan kishilik munasiwiti barliqini eskertip, türkiyening afriqa we afriqa xelqidin qetiy yüz örimigenlikini tekitlidi.

türkiyening bashta shimaliy afriqa döletliri bolup, afriqa qietesining erkinlik heriketlirini küchlük qollap kelgenlikini tilgha alghan erdoghan, türkiyening afriqa qitesidiki elchixana sanining 2005  - yilidiki 12 din hazirqi 42 ge köpeygenlikini, afriqa döletlirining enqerediki elchixaniliri sanining 10 din 37 ge köpeygenlikini bildürdi.

ortaq tirishchanliq körsitish netijiside, türkiye  - afriqa munasiwitini 16 yil ilgiri tesewwurmu qilghili bolmaydighan sewiyige yetküzgenliklirini éytqan erdoghan, sözini dawamlashturup: ««bizning (afriqa) chong quruqluqi bilen bolghan 5 milyard 400 milyon dollarliq soda miqdarimiz 2020  - yili 25 milyard 300 milyon dollardin éship ketti. 2021  - yili 1  - yanwardin bashlap yolgha qoyulghan afriqa chong quruqluqi erkin soda rayoni kélishimini yéqindin közitiwatimiz. biz ikki tereplik sodimizni ortaq tirishchanliq körsitip, aldi bilen 50 milyard dollar, andin 75 milyard dollargha yetküzidighanliqimizgha ishinimiz» dédi.

türkiyening türkiye hemkarliq we koordinatsiye agénitliqi — tika, yunus emre instituti, maarif fondi jemiyiti, anadolu agéntliqi, türkiye awiyatsiye shirkiti we qizil hilal ay qatarliq organliri arqiliq afriqa qitesidiki mewjutluqini téximu kéngeytkenlikini bayan qilghan erdoghan: «biz birlikte ghelibe qilish, birlikte tereqqiy qilish, birlikte güllinish, birlikte qolmuqol halda kelgüsige qarap méngishqa tirishiwatimiz» dédi.

dunyadiki yuqum  waksinisigha érishish adaletsizlikining we afriqa duch kelgen qiyinchiliqtin waqip ikenlikini alahide tilgha alghan erdoghan: «aldimzidiki mezgilde imkaniyitimizning yétishiche 15 milyon waksinini ortaqlishishni pilanlawatimiz. (yerlik yuqum waksinisi turkowak) qa munasiwetlik musape tamamlanghan haman, uni xelqimiz we afriqaliq qérindashlirimiz bilen birlikte pütkül insaniyetning xizmitige sunimiz» dégenlerni qeyt qildi.

«biz dunya 5 tin chongdur, dégen bayraq astida élip bériwatqan küreshni yalghuz özimiz üchünla emes, belki afriqaliq qérindashlirimiz üchünmu qiliwatimiz» dégen erdoghan yene, afriqaning b d t xewpsizlik kéngishide munasip halda wekillik rolini namayan qilishi üchün, küch qoshup heriket qilish lazim dédi.

erdoghan axirida: «inshaallah, bügün qilidighan ishlirimiz we chiqiridighan qararlirimiz bilen türkiye  - afriqa munasiwitining kelgüsini parlitimiz» dégenlerni sözlirige ilawe qildi.