shentop türkiyening polsha bilen özara hemkarliqlarni tereqqiy qildurushni xalaydighanliqini bildürdi

türkiye awazi radiyosi xewiri: mustafa shentop polshadiki uchrishishliri dairiside, tünügün (2021-yili 1-noyabir) kéngesh palatasining bashliqi tomasz grodzki (Tomasz Grodzki) bilen körüshti.

u körüshüshte, dost we ittipaqdash polshani ziyaret qilghanliqidin xushal ikenlikini bildürüp: «türkiye bilen polsha alte esirdin artuq diplomatik munasiwetlerge ige ikki dost we ittipaqdash dölet hésablinidu. döletlirimiz otturisida küchlük insaniy munasiwetler we ülgilik özara hemkarliq munasiwetlirimiz bar. tarixta munasiwetliri bunchilik uzun we zich bolghan köp dölet yoq» dédi.

u 2009-yili istratégiyelik shériklik sewiyege kötürülgen ikki dölet munasiwetlirining ijabiy ilgirilishi we yéqinqi mezgillerde yuqiri sewiyelik uchrishishlar süritining tézlishishining kishini memnun qildighanliqini eskertti.

u mundaq dédi:

«polsha bilen her sahe boyiche ikki tereplik we köp tereplik hemkarliqlarni téximu tereqqiy qildurushni arzu qilimiz.»

u polshaning türkiyening yawropa ittipaqigha eza bolush musapisini qollighanliqi üchün teshekkür éytti.

polsha kéngesh palatasining bashliqi tomasz grodzki türkiye bilen polsha otturisida her sahe boyiche munasiwetlerni tereqqiy qildurush yoshurun küchining barliqini, türkiyening polshaliqlar sayahet qilishta birinchi bolup  tallaydighan dölet ikenlikini bildürdi.

mustafa shentop we uninggha hemrah bolghan heyet warashawa pilsudki (Pilsudski) meydanidiki namsiz eskerler xatire munarigha gülchembirek qoydi. mustafa shentop bu yerdiki xatire deptirige béghishlima yazdi we xatire munari toghrisida melumat aldi.

mustafa shentop we heyet warashawa xan sariyinimu ziyaret qildi.