türkiyening orni natoning merkizide
türkiye dölet mudapie ministiri hulusi akar türkiyening natodiki ikkinchi chong armiyesi bolush süpitide, ittipaq merkizidin orun alidighanliqini bildürdi.
türkiye awazi radiyosi xewiri: dölet mudapie ministiri hulusi akarning hemrahliqida, ishtab bashliqi yashar güler we bashqa herbiy qomandanlar bilen, 2023-yilda natoning jeng qilghuchi armiye wezipisini üstige alidighan 3-armiye qomandanliq ishtabini jeng herikiti wezipisige teyyarlash meqsitide ötküzülgen «2021-qarawul» manéwirini közdin kechürdi.
manéwir ötküzülgen köp döletlik jeng merkizi qomandanliq ishtabida melumat alghan hulusi akar, dunya we rayon sewiyeside xeter hemde xirislar köpiyiwatqan mezgilni bashtin kechürüwatqanliqlirini qeyt qildi.
u xelqaraliq xewpsizlik we mudapie teshkilatlirining mesuliyitining her waqittikidin téximu éghir ikenlikini eskertip: «türkiye bir tereptin, térrorluq teshkilati daésh, el qaide, p k k|y p g, fethullahchi térrorluq teshkilati we bashqa térrorluq teshkilatlirigha qarshi birla waqitta küresh qilsa, yene bir tereptin, rayondiki xiris, xeter we tehditlerge qarshi turush bilen birge, ittipaqning manéwir, qurulmisi we xadimlar qoshunigha izchil halda hesse qoshup kelmekte. nato we yawropaning chégralirini térrorluqtin, her xil qanunsizliqtin we adem etkeschilikidin qoghdash üchün néme qilish kérek bolsa shuni qilmaqta. natoning ikkinchi armiyesi bolush süpitide, ittipaqning yükini we barliq qimmet qarashlirini ortaqliship, natoni öz bixeterlikining merkizige qoyush bilen birge, nato xewpsizlikining merkizidin orun almaqta» dédi.
u türkiyening bu yil (2021) natoning quruqluq armiye qomandanliq wezipisini muweppeqiyetlik halda axirlashturghanliqini bildürüp: «türkiye 2022-yilning béshidin tartip toluq heriket iqtidarigha ige bolidighan türkiye aliy teyyarliq sewiyesidiki déngiz armiye küchi bilen 2023 we 2028-yilida natoning déngiz armiye qomandanliq wezipisini üstige alidu. 2025-yili bolsa, nato hawa armiye qomandanliq wezipisini üstige alidu» dédi.
u ittipaqdash quruqluq armiye qomandanliq ishtabi, déngiz bixeterlikini mukemmelleshtürüsh merkizi, térorluqqa qarshi turush merkizi, tinchliq üchün ortaq terbiyelesh merkizi, balistik bashqurulidighan bomba radar meydani we yuqiri sewiyelik hawa armiye herikiti bazisi qatarliq muhim organlarning türkiyede ikenlkini eskertti.
u herbiy manéwirlarning herbiy qisimlarning birlikte heriket qilish iqtidarini ashurupla qalmay, özara hemkarliq musapisigha hesse qoshup, jeng qilish iqtidarini tereqqiy qilduridighanliqini we ittipaqning küchini ashuridighanliqini bildürüp, manéwirni ijra qilish musapisini pilanlash we emeliyleshtürüshke küch chiqarghanlargha teshekkür éytti.
