shentop özbékistan aliy mejlisi heyiti bilen körüshti
türkiye büyük millet mejlisi bashliqi mustafa shentop özbékistan aliy mejlisi qanun turghuzush palatasining birinchi muawin reisi we uning hemrahliqidiki heyet bilen bir yerge jem boldi.
türkiye awazi radiyosi xewiri: shentop, özbékistan aliy mejlisi qanun turghuzush palatasining birinchi muawin reisi, özbékistan-türkiye parlaméntlar ara dostluq guruppisining mesuli ekmel seydow we uning hemrahliqidiki wekiller ömiki bilen (tünügün) türkiye büyük millet mejlisining diwan zalida bir yerge jem boldi, hemde bu yerde qilghan sözide, özara ziyaretlerning ikki dölet munasiwetlirinng tereqqiy qilishi jehettin nahayiti zor ehmiyetke ige ikenlikini tekitlep mundaq dédi: «özbékistan we özbék qérindashlirimiz xelqimizning qelbide alahide orun tutidu, parlamént ezaliriningmu, téximu köp körüshüshler we ziyaretler arqiliq buninggha uyghun zémin hazirlinishi üchün gheyret körsitishige toghra kélidu.»
türkistan jughrapiyeside eng muhim orun tutidighan özbékistanning, türk hem islam medeniyitining eng güzel yadikarliqlirigha sahibxaniliq qilishtin sirt yene, siyasiy, iqtisadiy we ijtimaiy jehettinmu künséri gülliniwatqan we tereqqiy qiliwatqan özgiche dölet ikenlikini, bu ehwalning özbékistannimu xursen qilidighanliqini eskertken shentop, özbékistan bashtin kechürüwatqan islahat we tereqqiyat basquchinimu yéqindin közitiwatqanliqlirini tekitlep mundaq dédi: «özbékistanning türk döletliri teshkilatigha eza bolushi bizni intayin xursen qildi.»
özbékistan aliy mejlisi qanun turghuzush palatasining birinchi muawin reisi, özbékistan-türkiye parlaméntlar ara dostluq guruppisining mesuli ekmel seydow bolsa, hem xelqara türk medeniyiti teshkilati (türksoy) hem türk döletliri teshkilatida birlikte heriket qilidighanliqlirini qeyt qildi.
