erdoghan afghanistandiki özgirishler heqqide toxtaldi
jumhur reis rejep tayyip erdoghan türkiyening afghanistandiki mewjudiyitining yéngi hakimiyetningmu xelqara sahede nopuzini kücheytip, ishlirini qolaylashturidighanliqini éytti.
türkiye awazi radiyosi xewiri: jumhur reis erdoghan, bir qisim xususiy téléwiziye qanallirining neq meydan pirogrammisida küntertipke alaqidar özgirishler heqqide bergen bayanatida, taliban rehberlirini qobul qilish mumkinchilikining barliqini ilgirimu otturigha qoyghanliqini tekitlep mundaq dédi: «bu pozitsiyemiz hazirmu küchke ige, taliban rehberlirining soghuqqanliq bilen bériwatqan ilmiy bayanatlirini xursenlik bilen qarshi éliwatimiz, afghanistan xelqining huzuri, bu dölette yashawatqan türk qérindashlirimizning tinchliqi we dölitimizning menpeetlirini qoghdash üchün her jehettin hemkarliq ornitishqa teyyarmiz.»
afghanistandiki türkiye eskerlirining héchqachan urush qilghuchi küch süpitide wezipe ötimigenlikini eskertken jumhur reis erdoghan, mundaq dep körsetti: «biz u yerdiki eskerlirimizni ezeldin chet el küchi süpitide körmiduq we ishletmiduq, türkiyening afghanistandiki herbiy mewjudiyiti, yéngi hakimiyetning xelqara sahede nopuzini kücheytidu we ishlirini qolaylashturidu, nöwette biz (hamid karzai ayrodurumining bixeterliki mesiliside) bu sahediki yéngi réalliqlargha asasen pilanlirimizni tüzüwatimiz, uchrishishlirimiznimu buninggha mas halda dawamlashturuwatimiz, hakimiyet béshida kim bolsa bolsun, xushalliq künlerdimu, musibetlik künlerdimu afghanistanni qollash ehdige wapa qilish we qérindashliqimizning teqezzasidur.»
2021 – yili, 15 – awghust yekshenbe küni, paytext kabulni qorshaw astigha alghan taliban, pirézidént eshref ghénining döletni terk étishi we hökümet küchlirining paytexttin ayrilishidin kéyin, sheherni toqunushsiz halda kontrol astigha alghanidi.
