erdoghan partiyesining qurultiyida muhim söz qildi

türkiye awazi radiyosi xewiri: jumhur reis erdoghan, partiyesining enqerede ötküzülgen chong qurultiyida söz qilip, türkiyeni aldi bilen (jumhuriyet qurulghanliqining 100 - yili bolghan) 2023- yilliq nishanigha, andin 2053- yilliq nishanigha (milletchi heriket partiyeisi bilen birlikte qurghan) jumhur ittipaqi bilen birlikte yetküzidighanliqini bildürdi.

türkiye we türk xelqini izchil halda özining ichki awarigerchiliki bilen meshghul qilip qoyush arqiliq yéqinqi ikki esirning mabeynide gewdilik özgirishlerning sirtida qaldurup qoyghanlarning hazirmu oxshash oyunni oynashning koyida ikenlikini, emma ularning bu qétim muweppeqiyet qazinalmaydighanliqini tekitligen erdoghan: «chünki, bu qétim perqliq bir türkiye bar. 84 milyon puqrasi özini bir millet dep atawatqan bir türkiye bar. bu qétim, peqet ilkidiklerge ige chiqish bilenla boldi qilmaydighan, dunyaning siyasiy we iqtisadiy sistémisidiki özige layiq ornini qolgha keltürüsh iradisini 2023  -  we 2053 - yilliq nishanliri we 2071  - yilliq ghayiliri arqiliq namayan qilghan bir türkiye bar. yéqinqi sekkiz yilning mabeynide qurulghan tuzaqlarni bir – birlep weyran qilghan bir türkiye bar. qolliridin kelse, yamghur yéghiwatqan peyttimu türkiyege bir piyale su bermeydighanlarning her küni aldimizgha yéngi mesililerni téngish bilen chiqishliri bizni yolimizdin qayturalmidi. yene qayturalmaydu» dégenlerni qeyt qildi.

2023- yil nishanlirini yéngi bashlinishqa aylandurup, 21- esirni we uningdin halqighan zamanlarni öz ichige alidighan büyük we küchlük türkiye qurup chiqqanliqlirini bildürgen erdoghan, adalet we tereqqiyat partiyesining türkiyeni maariptin saghlamliqqiche, sanaettin tenterbiyegiche bolghan sahelerge salghan sélinmilar arqiliq tereqqiy qildurghanliqini tilgha élip ötti.

erdoghan, bölgünchi térrorluq teshkilati p k k ni öz ichige barliq térrorluq teshkilatlirini meghlubiyetke uchritip, dölet chégraliri ichide heriket qilalmaydighan halgha chüshürüp qoyghanliqlirini tekitlidi.

qatnash sahesige 932 milyard türk lirasi meblegh sélish arqiliq türkiyening ul eslihelirini yéngilap tereqqiy qildurghanliqlirigha isharet qilghan erdoghan, kowid – 19 yuqumi sewebidin turghunluq basquchigha kirip qalghan bolsimu, türkiyening, kélechekning eng chong awiyatsiye qatnishi ul eslihesige ige döliti bolush süpiti bilen dunyada birinchi orunda turidighanliqi eskertti.