chawushoghlu witénburg yighinida muhim söz qildi

türkiye awazi radiyosi xewiri: dölitimiz (türkiye jumhuriyiti) tashqi ishlar ministiri mewlüt chawushoghlu, bulturning türkiye- yawropa ittipaqi munasiwetliri sinaqlargha duch kelgen müshkül bir yil bolghanliqini, bu yil bolsa, türkiye bilen yawropa ittipaqi otturisida söhbetlerni eslige keltürüshning yéngi köznikining échilghanliqini otturigha qoydi.

8 – nöwetlik türkiye - gollandiye (witénburg) yighini chawushoghlu bilen gollandiye tashqi ishlar ministiri stéfan bilokning riyasetchilikide torda ötküzüldi.

ministir chawushoghlu bu sin yighinining ikki dölet otturisidiki yuqiri qatlamliq söhbetni dawamlashturush arzusining ipadisi ikenlikini eskertti.

mewlüt chawushoghlu, türkiye bilen gollandiyening yawropaning ikki perqliq bulungidiki ikki dölet bolush süpiti bilen, qitediki saqliniwatqan mesililerni hel qilishqa töhpe qoshidighan nurghun nersilerge ige ikenlikini éytti.

bulturning türkiye- yawropa ittipaqi munasiwetliri sinaqlargha duch kelgen müshkül bir yil bolghanliqini eslitip ötken chawushoghlu: «ötken yili ottura sherq, qibris, liwiye, süriye, shundaqla kawkaz rayonida muhim özgirishler bolghan aldirash bir yil boldi. yawropa ittipaqi dékabirdiki bashliqlar yighinida türkiyege qolini uzatti, bizmu ijabiy inkas qayturduq. hazir türkiye bilen yawropa ittipaqi otturisidiki söhbetlerni eslige keltürüsh üchün yéngi purset penjirimiz bar» dédi.

chawushoghlu bélgiye, gérmaniye, italiye, ispaniye we portugaliyelik mensepdashliri bilen ötküzgen uchrishishliriningmu yawropa ittipaqining köp qisim ezalirining mushu xil qarashta ikenlikini tekitlesh mahiyitide ikenlikini éytti.

mewlüt chawushoghlu 2020- yili 1- ayning 20- künidin 22- künigiche élip barghan bélgiyening paytexti biryusséldiki ziyariti jeryanida yawropa ittipaqi kéngishi reisi charléz mishél bilen körüshüp, mueyyen waqit jedwili ichide «konkrét qedemlerning yol xeritisi»ni sizip chiqish toghrisida kélishim hasil qilghanliqini eskertti.

türkiye bilen yawropa ittipaqining semimiy shérikchilikining soda, énérgiye, bixeterlik, mudapie, süriye, liwiye, balqan we kawkaz rayonini öz ichige alghan nurghun muhim mesilide heqiqiy özgirishlerni peyda qilishining mumkinlikini otturigha qoyghan chawushoghlu, tereplerning 2016- yildiki köchmenler kirizisi mezgilide shérikchiliklirining iqtidarini namayan qilghanliqini qeyt qildi.

ministir chawushoghlu: «türkiye kandidat dölet bolush süpiti bilen, eng küchlük irade bilen heqiqiy hemkarliqqa teyyar» dédi.

barliq munasiwetlerdikige oxshash her ikki terepning bezi isteklirining barliqini bildürgen chawushoghlu, türkiyening istekliri arisida 18- mart ortaq tonushining her jehettin yéngilinishi we bu  arqa körünüshte yawropa ittipaqigha qoshulushi, tamozhna ittipaqini yéngilash, wizini erkinleshtürüsh, köchmenler sahesidiki hemkarliq, yuqiri sewiyediki diyalog we térrorizmgha qarshi küresh hemkarliqining muzakire qilinishi qatarliq mesililerning barliqini körsetti.

tashqi ishlar ministiri mewlüt chawushoghlu, türkiyening bu dairide girétsiye bilen izdinish söhbetlirini bashlighanliqini, firansiye bilen bolghan munasiwetlerni normallashturush tirishchanliqini dawamlashturuwatqanliqini we ichki qisimda diqqitini islahat musapisige merkezleshtürgenlikini tilgha élip ötti.

türkiyening yene buningdin burun sunghan qibrisqa munasiwetlik «5 + birleshken döletler teshkilati» yighini we sherqiy aqdéngiz yighini ötküzüsh teklipining hazirmu küchke ige ikenlikini eskertken chawushoghlu, buni gollandiyeningmu qollaydighanliqigha ishnidighanliqlirini sözlirige ilawe qildi.

u gollandiyediki türklerning ikki döletning köp tereplimilik munasiwitining eng muhim amillirining biri ikenlikini ipadilep mundaq dédi: «biz türk xelqining gollandiye jemiyitige aktip we iqtidarliq kishiler süpitide maslishishini qollaymiz.».

gérmaniyediki yuqum waksinisini yasap chiqqan türk-gérman tetqiqatchilar ughur shahin we repiqisi özlem türejidin pexirlinidighanliqini tekitligen chawushoghlu , ularning türklerning yawropa bilen bir gewdilishishining muweppeqiyetlik ülgisi qataridin orun alghanliqini otturigha qoydi.

chawushoghlu «8-nöwetlik witénburg yighini» ning ikki döletning hemkarliqini yaxshilaydighanliqini tekitlep, yéngiliq yaritish xizmet guruppisini körüp intayin xushal bolghanliqini we bashqa xizmet guruppilirigha utuq tileydighanliqini bildürdi.