chawushoghlu paraxot xadimliri toghrisida xewer yoqluqini bildürdi

türkiye awazi radiyosi xewiri: türkiye tashqi ishlar ministiri mewlüt chawushoghlu déngiz qaraqchilirining élip qéchilghan paraxot xadimliri toghrisida héchkim bilen alaqe qilmighanliqini bildürdi.

u türkiye büyük millet mejlisi (parlaménti) de axbarat élan qilish yighini ötküzdi.

u: «puqralirimizgha qaritilghan hujum yüz berdi. 15 puqramiz déngiz qaraqchiliri teripidin élip qéchildi. paraxot bixeter, bixeterlikke munasiwetlik qiyinchiliqimiz yoq. bir puqramiz yarilandi, emma ehwali nahayiti yaxshi» dédi.

u türkiye jumhur reisi rejep tayyip erdoghanning hujum yüz bergendin tartip weziyetni közitip turuwatqanliqini bildürüp: «hazirghiche déngiz qaraqchiliridin xewer kelmidi. rayondiki döletlerning hemmisi bilen alaqe ornattuq» dédi.

libériye bayriqi ésilghan «mozart» isimlik paraxot, 23-yanwar (2021) nigériyening lagos shehirige texminen 180 mil kélidighan déngiz tewelikide déngiz qaraqchilirining hujumigha uchrighan idi.

nigériyening lagos shehiridin jenubiy afriqaning kéyip tawn (Cape Town) shehirige qarap ilgirilewatqan paraxottiki 19 xadimdin ezerbeyjanliq bir xadim öltürüldi, 15 xadim élip qéchildi.

weqede qutulup qalghan üch xadim tünügün (2021-yili 24-yanwar) paraxotni gabonning gentil portigha toxtatqan idi.