erdoghan: yuqum ish dunyasining aldida yéngi purset penjirilirinimu achti
jumhur reis rejep tayyip erdoghan «kowid – 19» yuqumining türlük xirislar, qiyinchiliqlar we qiyin ötkellerni keltürüsh bilen bir waqitta ish dunyasining aldida yéngi purset penjirilirini achqanliqini éytti.
türkiye awazi radiyosi xewiri: jumhur reis erdoghan, türkiye yash karxanichilar konfédératsiyesi ijraiye heyiti ezalirini qobul qilghanda, 2020 – yilining, «kowid – 19» yuqumi sewebidin pütkül dunya bilen birlikte türkiyedimu qiyin sharaitta ötkenlikini eskertti, yuqum mezgilide, küchlük sehiye qurulmisidin sirt yene, tetqiq qilish – tereqqiy qildurush, éksportning soda ishlirida bazar we mehsulat serxilliqining muhimliqiningmu ochuq – ashkara halda körülgenlikini qeyt qildi, türk shirketlirining ela süpetlik mehsulatliri, riqabetchi bahaliri we ishenchilik bolushi tüpeyli, «kowid – 19» yuqumi mezgilide reqiblirige qarighanda alahide üstünlükni igiligenlikini tekitlep mundaq dédi: «éksportta aldinqi yilni 169.5 milyard dollar bilen ottura mezgillik pirogramma nishanini 5 milyardtin yuqiri sewiyege yetküzüshke muweppeq bolduq, dölitimizning yer shari xaraktérlik éksporttiki ülüshi, ötken yilning yanwar – öktebir aylirigha ait sanliq melumatliri étibari bilen, tunji qétim % 1 tin éship, % 1.03 sewiyesige yetti. éksportchilirimizning sani 87 ming 400 ashti, bulturqi tunji qétim éksport sahesige qedem qoyghan shirketlirimizning sani 18 ming 123 ke yetti.»
jumhur reis erdoghan, 2020 – yili dölette qurulghan shirket sanining «kowid – 19» yuqumigha qarimay % 20 éship, 101 ming 318 ge yetkenlikini eskertish bilen bir waqitta, meblegh sélish üchün téximu yaxshi muhit yaritip béreleydighan, téximu yaxshi mölcherlesh zémini hazirlap béreleydighan, meblegh salghuchilarning teleplirini yenimu yüksek sewiyede qanduralaydighan bir sharait yaritish üchün imkaniyetning bariche tégishlik qedemlerning tashlinidighanliqinimu sözlirige ilawe qildi.
