chawushoghlu yawropa ittipaqining yuqiri derijilik emeldarliri bilen körüshti
dölitimiz (türkiye jumhuriyiti) tashqi ishlar ministiri mewlüt chawushoghlu, türkiyening yawropa ittipaqigha qoshulush musapisini janlandurush kéreklikini otturigha qoydi.
türkiye awazi radiyosi xewiri: bélgiyening paytexti biryusséldiki uchrishishlirini dawamlashturuwatqan ministir mewlüt chawushoghlu, yawropa ittipaqi tashqi munasiwetler we xewpsizlik siyasetliri aliy wekili josép borrél bilen körüshkendin kéyin yawropa ittipaqi komitétigha bérip, yawropa ittipaqi komitéti reisi ursula won dér léyén, shundaqla komitétning muawin reisi margaritis shinas, ichki ishlargha mesul ezasi ilwa yohanson we qoshnidarchiliq siyasiti, qoshumche kéngiyish ishlirigha mesul ezasi oliwér warxéli bilen körüshti.
ministir chawushoghlu uchrishishtin kéyin, ijtimaiy taratqudiki adrésida bu heqte uchur hembehrilidi.
«bizning qatnishish musapimiz janlandurulushi kérek» dégen chawushoghlu, sözini dawamlashturup: «tamozhna ittipaqigha özgertish kirgüzülüshi we wizining emeldin qaldurulushi ishqa ashurulushi kérek. qanunsiz köchmenler we térrorluqqa qarshi turush jehettiki hemkarliqni kücheytishimiz kérek. yawropada qed kötürüwatqan irqchiliq, kemsitish we islamgha qarshi turush xahishlirigha qarshi birdek küresh qilishimiz kérek» dégenlerni qeyt qildi.
chawushoghlu borrél bilen ötküzgen uchrishishi toghrisidiki uchurida: «biz yawropa ittipaqi bilen yéngi bir sehipe échishni xalaymiz. 2016- yili 18- martta imzalanghan kélishimni bashtin axir yéngilashqa toghra kélidu. ijabiy küntertipni saqlap qélish üchün ortaq tirishchanliq körsitishimiz kérek. yawropa kéngishi we komitét reisliri ziyaretlirining teyyarliqliri toghrisida sözleshtuq» dédi.
yawropa ittipaqi komitéti reisi won dér léyén yighin toghrisidiki uchurida: «diyalog intayin muhim, emma shuning bilen bir waqitta biz emeliy meydanda ishenchlik heriketlerning élip bérilishini ümid qilimiz» dégen bolsa, muawini margaritis shinas: «ijabiy qedemlerni tashlashning peyti keldi» dédi.
borrélning ishxanisi teripidin élan qilinghan bayanattimu: «yawropa ittipaqining türkiye bilen bolghan qimmet qarash we pirinsiplargha baghliq hemkarliq we özara payda yetküzüshni öz ichige alidighan munasiwetlerni tereqqiy qildurushida istratégiyelik menpeetliri bar. josép borrél bilen mewlüt chawushoghluning uchrishishi bu yönilishke qarap tereqqiy qilish üchün semimiy, éniq we chongqur pikir almashturush pursiti yaratti» dégen ibarilerge orun bérildi.
