türkiye - ezerbeyjan - pakistan üch terep tashqi ishlar ministirliri yighini islamabadta chaqirildi

türkiye awazi radiyosi xewiri: dölitimiz (türkiye jumhuriyiti) tashqi ishlar ministiri mewlüt chawushoghlu, türkiye, pakistan we ezerbeyjanning nurghun sahelerde munasiwetlerni tereqqiy qildurush toghrisida birdeklik hasil qilghanliqini bildürüp: «xewpsizlik, muqimliq we bayashatliqni yuqiri kötürüsh üchün muhim qedemlerni tashlashqa qarar qilduq» dédi.

ministir mewlüt chawushoghlu pakistanning paytexti islamabadta chaqirilghan türkiye - ezerbeyjan - pakistan üch terep tashqi ishlar ministirliri yighinidin kéyin ötküzülgen qoshma axbarat élan qilish yighinida söz qildi.

yighinda nurghun sahelerde hemkarlishishni qarar qilghanliqlirini tekitligen chawushoghlu: «xewpsizlik, muqimliq we bayashatliqni yuqiri kötürüsh üchün muhim qedemlerni tashlashqa qarar qilduq. yuqiri derijilikler yighinimizning birinchi qétimliqini 2017 – yili bakuda chaqirghaniduq, emdi nöwet türkiyege keldi. bügün biz bu xil yighinlarni köprek ötküzüshni qarar qilduq. bashqiche dégende, üch - töt yil saqlashning hajiti yoq» dédi.

mewlüt chawushoghlu, pakistan tashqi ishlar ministiri shah mehmud qureshi we ezerbeyjan tashqi ishlar ministiri jeyhun bayramow bilen ötküzgen üch terep yighinida döletler otturisidiki munasiwetlerni tereqqiy qildurushning muhimliqiningmu otturigha qoyulghanliqini bayan qilip: «bolupmu qatnash we énérgiye sahesidiki ul esliheni tereqqiy qildurushning muhimliqi toghrisida söhbetleshtuq» dégenlerni qeyt qildi.

pakistan tashqi ishlar ministiri shah mehmud qureshimu dölitining türkiye we ezerbeyjan bilen qoyuq we dostane munasiwiti barliqini, u üch terep munasiwetliride intayin küchlük ishench berpa qilinghanliqini tilgha élip ötti.

yighinda soda, sélinma we xewpsizlik saheliri shundaqla istratégiyelik we siyasiy hemkarliq mesililirining muzakire qilinghanliqini bayan qilghan qureshi, üch döletning nurghun oxshimighan mesililerde yéqin oy we ortaq menpeetlerge ige ikenlikini otturigha qoydi.

ezerbeyjan tashqi ishlar ministiri jeyhun bayramow bolsa: «pakistan we türkiye shirketlirini biz (erméniye ishghaliyitidin) azad qilghan zéminlar (taghliq qarabagh)ning qayta qurulushigha qétilishqa teklip qilimen» dédi.

muxbirlarni kütüwélish yighinidin kéyin, türkiye, ezerbeyjan we pakistan otturisida siyasiy, iqtisadiy, tinchliq we xewpsizlik saheliri qatarliq nurghun sahelerdiki hemkarliqni chongqurlashturushqa kapaletlik qilidighan «islamabad xitabnamisi» imzalandi.