23.01.2024

türkiye awazi radiyosi: «höriyet géziti», «alper gezerawji jumhur reis erdoghan bilen alaqileshti» serlewhilik xewiride, munu uchurlargha orun ajratti:

alem boshluqigha chiqqan tunji türkiyelik alem uchquchisi alper gezerawji xelqara alem ponkiti (ISS) gha yétip bérip 3 – künide, jumhur reis erdoghan bilen biwaste alaqileshti.

xewerde, erdoghanning, «bu wezipe bilen birlikte perzentlirimizning we yashlarning alem boshluqigha bolghan qiziqishi téximu küchiyidu. siz bizning tunji alem uchquchimiz boldingiz. emma elwette axirqisi bolmaysiz. buningdin kéyin, türkiye adem ewetip alem boshluqi wezipisini ijra qilidighan sanaqliq döletler ichidin orun alidu. inshaallah bu sepirimiz téximu kücheygen halda dawamlishidu» dégenliki qeyt qilindi.

«star géziti», «ministir güler: <alper gezerawjining alem boshluqi sepiri dölitimiz üchün tarixiy ehmiyetke ige bir qedemdur> dédi» serlewhilik xewiride, munu uchurlargha orun ajratti:

dölet mudapie ministiri yashar güler tünügün (22-yanwar) élan qilghan bayanatida, tunji qétim bir türkiye puqrasining yene kélip, hawa armiyesining közge körüngen uchquchiliridin biri bolghan polkownik alper gezerawjining alem boshluqigha chiqqanliqini tekitlep: «bu seper dölitimizning pen-téxnika sahesidiki ilgirilishining yéngi we tarixi ehmiyetke ige bir qedimi bolidu. buningdin kéyin, bizning alem tetqiqatimiz qetiylik bilen dawamlishidu» dédi.

«weten géziti», türkiye qoralliq qisimlirining tünügün élan qilghan bayanatida: «qehriman türkiye qoralliq qisimlirimiz süriyening shimalidiki firat qalqini rayonigha oq chiqarghan térrorluq teshkilati p k k/y p g ezasi 14 térrorchini zembirek bilen ujuqturdi» dégenlikini xewer qildi.

«sabah géziti», «qurulmiliq islahat yolgha qoyulidu» serlewhilik xewiride, munu uchurlargha orun ajratti:

iqtisadni maslashturush kéngishi tünügün muawin jumhur reis jewdet yilmazning riyasetchilikide bir yerge jem boldi. yighindin kéyin élan qilinghan bayanatta: «aldimizdiki mezgilde, <türkiye esri> tesewwuri dairiside meblegh sélish, ishqa orunlishish, ishlepchiqirish we éksportni merkez qilghan yüzlinish bilen iqtisadimizning riqabet küchini we ünümini ashuridighan qurulmiliq islahatlar yolgha qoyulidu» déyildi.

«xeber türk géziti», türkiye bilen ezerbeyjan otturisidiki tashqi soda omumiy sommisining 2023 – yilida aldinqi yilgha sélishturghanda %31 éship, 7 milyard 650 milyon dollargha yetkenlikini xewer qildi.