20.05.2024

türkiye awazi radiyosi: «xabertürk» géziti: jumhur reis rejep tayyip erdoghanning 19-may atatürkni xatirilesh, yashlar we tenterbiye bayrimida yashlar bilen körüshkenlikini xewer qildi.

gézitning xewiride körsitilishiche, 19-mayning erkinlikning simwoli ikenlikini éytqan jumhur reis erdoghan, türkiyening eng chong küchi we ümidining yashlar ikenlikini tekitligen.

«hürriyet» géziti: 19-may atatürkni xatirilesh, yashlar we tenterbiye bayrimining türkiyening herqaysi jaylirida qizghin tebriklengenlikini, xelqning türkiye jumhuriyitining qurghuchisi mustapa kamal atatürkning jesiti qoyulghan anitqabirni (atatürk xatire sariyi) ziyaret qilghanliqini yazdi.

xewerde, türkiye jumhuriyiti yashlar we tenterbiye ministiri osman ashkin bakning anitqabir xatire deptirige: «dölitimiz we bayriqimizni her sahede yükseltishni dawamlashturimiz» dégenliki qeyt qilindi.

«star» géziti: türkiye jumhuriyiti énérgiye we tebiiy bayliqlar ministiri alparslan bayraqtarning, yéqinda tebiiy gaz bayqalghan qara déngizdin néfit bayqalghanliqining xush xewirini bérishlirining mumkinlikini eskertip: «néfit tépilish alametliri bar qara déngizdiki bezi jaylardiki tekshürüshlirimiz dawam qiliwatidu. yéqinda xush xewerni ortaqlishishimizni ümid qilimen» dégenlikini xewer qildi.

«yéngi shepeq» géziti: wénézuéla pirézidénti nikolas maduro türkiye bilen wénézuéla otturisida istanbulda tüzülgen meblegh sélish kélishimini testiqlash musapisining axirlashqanliqi toghrisidiki höjjetni téléwiziye neq meydan tarqitishida imzalighandin kéyin: «dostum jumhur reis rejep tayyip erdoghangha salamlirimni yollaymen» dégenlikini yazdi.

«weten» géziti: istanbul pay chéki baziridiki chet ellik meblegh salghuchilarning pay nisbitining %40 ke yetkenlikini, türkiye iqtisadiy körsetküchlirining yuqiri kötürülüshi we alaqidar tereplerning ijabiy doklatlirining chet ellik meblegh salghuchilarning qiziqishini téximu ashuridighanliqini, pay chéki baziri körsetküchining yéngi yüksek pellilerni yaritish mumkinchiliki barliqini xewer qildi.