17.05.2024

türkiye awazi radiyosi: «xabertürk» géziti: jumhur reis rejep tayyip erdoghanning giruziye bash ministiri irakli kobaxidzé bilen ötküzgen qoshma muxbirlarni kütüwélish yighinida söz qilip: «barliq insaniyet pelestin xelqining erkinlik kürishini choqum qollishi kérek. men dunyaning her qaysi jaylirida dawam qiliwatqan pelestinni qollash heriketlirini nahayiti muhim we intayin qimmetlik, dep qaraymen» dégenlikini oqurmenlirining diqqitige sundi.

«sabah» géziti: giruziye bash ministiri kobaxidzéning erdoghanning bir jumhur reisla emes, belki pütkül türkiyening menpeetini qoghdaydighan heqiqiy rehber ikenlikini bildürüp: «sizning rehberlikingiz hemmimizge ülge» dégenlikini xewer qildi.

«hürriyet» géziti: <bayqar téxnologiye> shirkitining yuqiri derijilik bashqurghuchisi xaluq bayraqtarning bayanat bérip, shirketning «Bayraktar TB2» namliq qoralliq uchquchisiz hawa apparatlirining eng yéngi sistémisini tünügün polshagha yetküzüp bergenlikini éytqanliqini yazdi.

gézitning xewiride körsitilishiche, xaluq bayraqtar bu heqte toxtilip: «shundaq qilip, türkiye tarixida tunji qétim shimaliy atlantik ehdi teshkilati we yawropa ittipaqigha eza bir döletke yuqiri téxnikiliq qoralliq uchquchisiz hawa apparati éksportini muweppeqiyetlik tamamlighan bolduq» dégen.

«yéngi shepeq» géziti: türkiye jumhuriyiti qatnash we ul eslihe ministirliqi teripidin yéngilinip xizmetke kirishtürülgen sirkechi-kazlicheshme tömür yol liniyesining yuqiri baha érishkenlikini xewer qildi.

xewerde körsitilishiche, bu liniye dunyaning aldinqi qatardiki sayahet tor béketlirining biri bolghan «loneyplanet.com» teripidin <yawropadiki sayahet qilishqa erziyidighan 6 tömür yol liniyesi> qatarigha kirgüzülgen.

«star» géziti: engliyediki «dewr aliy maarip» (THE) namliq aliy maaripni bahalash orginining, dunyadiki  2024-yilidiki eng yaxshi «yash uniwérsitétlar tizimliki»ge 58 uniwérsitéti kirgen türkiyening, tizimlikning eng köp uniwérsitéti wekillik qilghan dölitige aylanghanliqini xewer qildi.