04.01.2024

«xeber türk géziti», «erdoghan irangha teziyename élan qildi» serlewhilik xewiride, munu uchurlargha orun ajratti:

«jumhur reis rejep tayyip erdoghan iranning kirman ölkiside élip bérilghan qebih térorluq hujumliridin qattiq qayghurghanliqini bildürdi. erdoghan hembehirigen uchurida: <dost we qérindash iran xelqige teziye bildürimen> dédi»

«star géziti», jumhur reis erdoghanning iran pirézidénti ibrahim reiysi bilen téléfonda körüshkenlikini, söhbette reiysining türkiye ziyaritini kéyinki künge kéchiktürüsh qarari élinghanliqini xewer qildi.

«sabah géziti», «xaqan fidan israiliyege liwan heqqide agahlandurush berdi» serlewhilik xewiride, munu uchurlargha orun ajratti:

tashqi ishlar ministiri xaqan fidan bezi israiliyeliklerning urushni liwanghiche kéngeytishni xalaydighanliqi terepke hemmining diqqitini tartip agahlandurdi. fidan mundaq dédi:

«bu yol (israiliye-liwan urushi) axiri yoq xalta kochidur. eger bundaq ish yüz berse, bu urush elwette axirlashmaydu. del eksiche, eger mesile hel qilinmaqchi bolsa, tinchliq we ikki döletlik hel qilish charisigha merkezlishish lazim»

«höriyet géziti», qizil ay jemiyti yollighan ikkinchi yardem paraxotidiki boyumlarning ghezzege yétip barghanliqini, paraxottiki 107 tonna insanperwerlik yardem boyumlirining 147 yük aptomobiligha qachilinip ghezzege yolgha chiqqanliqini, ulardin chédir, kariwat, yémeklik we taziliq matériyalliri qachilanghan 66 yük aptomobilining ghezzege yétip barghanliqini xewer qildi.

«yéngi shepeq géziti», türkiyening xelqara höddigerlik tarmaqlirining 2023-yilini qimmiti 27 milyard 400 milyon dollarliq qurulushlarni tamamlash bilen uzatqanliqini, 135 dölette öz üstige alghan layihelerning omumiy qimmiti 501 milyard 900 milyon dollargha yetkenlikini, ispaniyediki barsélona kulubining tenterbiye meydanini yéngilash layihesi chetelde qolgha keltürülgen simwolluq layihelerning birsi bolghanliqini xewer qildi.