21.12.2021
bügünki türkiye metbuatliridin tallap teyyarlighan muhim xewerlirimizning qisqiche mezmunliri töwendikiche:
türkiye awazi radiyosi: «xeber türk géziti», türkiye jumhur reisi rejep tayyip erdoghanning türkiyening afriqa döletliri bilen soda omumiy sommisini 5.4 milyard dollardin 30 milyard dollargha chiqarghanliqlirini, emdilikte bolsa, bu nishanning 50 milyard dollargha, arqidin 75 milyard dollargha chiqirish ikenlikini éytqanliqini xewer qildi.
xewerde, rejep tayyip erdoghanning, «tarixida ékspilatatsiye eyibi bolmighan xelq bolush süpitimizde, afriqa qitesi bilen ortaq paydilinish, barawer shériklik asasida özara hemkarliqimizni téximu kücheytishke tirishimiz» dégenliki bildürüldi.
«hörriyet géziti», xezine we maliye ministiri nureddin nebati twittérda bayanat élan qilip, «hörmetlik jumhur reisimiz élan qilghan türkiye lirasini küchlendüridighan iqtisadiy xitabname sayisida, tünügünkidin téximu qetiy irade bilen yolimizni dawamlashturimiz. héchkim guman qilmisun» dégenlikini xewer qildi.
«sabah géziti», tashqi ishlar ministiri mewlüt chawushoghluning, türkiyening rayon muqimliqigha bolghan ishenchni biwaste ashuridighan qedemlerni tashlighanliqini eskertip, türkiye bilen erméniye otturisida awiyatsiye qatnishining bashlinidighanliqini bildürgenlikini xewer qildi.
xewerde, mewlüt chawushoghluning: «erméniye bilen biwaste uchrishishlarni bashlash üchün alahide wekillirimizni wezipige teyinliduq. eng qisqa waqit ichide alahide wekillirimiz körüshidu. bezi shirketler ayropilan seperlirini aldimizdiki künlerde bashlaydu» dégenliki qeyt qilindi.
«star géziti», türkiyening b d t diki daimiy wekili feridun sinirlioghluning, b d t xewpsizlik kéngishige naraziliq bildürüp: «b d t xewpsizlik kéngishini xetküchlesh nahayiti yaxshi, emma béshini tiqidighan bir öy téximu yaxshi. tarixning bu kéngeshni xetküch nesli dep atishidin ensireymen. her ay bu kéngeshke kélip gep qilip, twit hembehirlep kétimiz. kéyinki ay yene oxshash ishlarni tekrar qilip turimiz» dégenlikini xewer qildi.
xewerde, feridun sinirlioghluning b d t xewpsizlik kéngishining süriye xelqining axirqi pursiti ikenlikini eskertip: «qolimizdin mushunchilik ish kélemdu? éhtimal, yéngi yil toghrisidiki qararlirimizni tiwittérda hembehirleshning ornigha, süriye xelqini qutquzush üchün heqiqeten bir ishlarni qilalishimiz mumkin» dégenliki qeyt qilindi.
«yéngi shepeq géziti», türkiyening ijtimaiy teshkilatlar we idare-organlirining sayisida, asiya bilen afriqadiki 22 dölette 34 mingdin artuq quduq qazghanliqini xewer qildi.
xewerde, bu ikki qitediki 18 milyondin artuq kishining pakize sugha érishkenliki bildürüldi.
xewerde yene, her yili xoléra, tolghaq, qizitma we ich sürüsh qatarliq késellikler tüpeylidin 485 ming kishi jénidin ayrilidighan bu jughrapiyelerde, su tazilash we bir qanche kilométirlargha sozulghan su turuba linyelirining xizmetke sunulghanliqi qeyt qilindi.
