19.11.2021
bügünki türkiye metbuatliridin tallap teyyarlighan muhim xewerlirimizning qisqiche mezmunliri töwendikiche:
türkiye awazi radiyosi: «xeber türk géziti», bulghariyening enqerede turushluq bash elchisining türkiye tashqi ishlar ministirlqigha chaqirilghanliqini xewer qildi.
xewerde, bulghariyediki saylamgha türkiyening arilashqanliqi toghrisidiki gep-sözlerning ret qilinghanliqi bildürüldi.
xewerde, bulghariyening enqere bash elchisi anguél xristow tcholakowgha, türkiyening bulghariye saylimi ramkisida, türkiyede bélet tashlash mesiliside her xil hemkarliqlarni asas qilip, zörür asanliqlarning yaritilghanliqining tekitlengenliki qeyt qilindi.
«hörriyet géziti», türkiye dölet mudapie sanaiti bashliqi ismail demirning, «bügün türkiye mudapie sanaitide dunyadiki teminligüchiler chiqarghan barliq tosqunluqlargha we yolgha qoyghan ashkara-mexpiy émbargolargha qarimastin, milliy menpeetlirimizni qoghdash üchün qilishqa tégishlik ishlarni héchkimge mohtaj bolmastin qilalaydighan we buningda özini ispatliyalaydighan ehwalda» dégenlikini xewer qildi.
«yéngi shepeq géziti», türkiye jumhur reisi rejep tayyip erdoghanning xush xewer bérip, 4-burghilash paraxotining 2022-yilning birinchi charikide xizmitini bashlaydighanliqini we bu paraxotqa «alparslan» ismining bérilgenlikini éytqanliqini xewer qildi.
«sabah géziti», mutexessislerning axirqi sanaet sanliq melumatlirini asas qilip, türkiyening 2021-yilning üchinchi charikide %7.84 iqtisadiy éshish mumkinchilikige ige bolghanliqini éytqanliqini xewer qildi.
xewerde, mutexessislerning bu iqtisadiy éshishni éksportta arqa-arqidin qolgha kelgen rékortlar, mal ishlepchiqirish yaki mulazimet kespidiki küchlük signallargha asasen texmin qilghanliqi eskertildi.
