ghezzede kéreksiz suning dawamliq déngizgha éqip kétishi «muhit apiti» xewpini shekillendürmekte

ghezze rayonluq sheherlik hökümiti israiliye uda 26 kündin buyan üzlüksiz bombardiman qiliwatqan ghezze rayonidiki kéreksiz suni bir terep qilish eslihelirining ishlimesliki sewebidin, paskina suning dawamliq déngizgha éqip kétishining «muhit apiti» xewpini shekillendürüwatqanliqi toghrisida agahlandurdi.

ghezze rayonluq sheherlik hökümiti teripidin élan qilinghan yazma bayanatta, israiliyening bombardimanliri jeryanida ziyangha uchrighan, tok toxtap qélish we yéqilghu yétishmeslik sewebidin kéreksiz suni bir terep qilish esliheliridin paskina suning dawamliq déngizgha éqiwatqanliqi bayan qilindi.

bayanatta, ghezze rayonidin her küni 65 ming istakan kéreksiz suning déngizgha éqip kétiwatqanliqi, bu ehwalning insan saghlamliqigha we muhitqa éghir xewp-xeterlerni élip kélidighanliqi otturigha qoyuldi.

ghezze shehiridiki «sheyx rizwan köli» gimu her küni 10 ming istakan paskina suning pürkülidighanliqi eskertilgen bayanatta, paskina su mesilisining dawamlishishining ghezze shehiride «pütünley weyran bolush we chong apet» ni keltürüp chiqiridighanliqi toghriliq agahlandurush bérildi.

ghezze sheherlik hökümiti yene sehiye, muhit we insanperwerlik saheliride xizmet ishlewatqan teshkilatlarni bu mesilige «jiddiy arilishishqa» chaqirdi.

hamasning herbiy qaniti bolghan qessam birigadiliri 7-öktebir shenbe küni etigende, israiliyening «pelestinliklerning heq - hoquqliri we mesjidi eqsani öz ichige alghan muqeddes jaylirini dawamliq depsende qilish qilmishlirigha jawab qayturush» meqsitide, israiliyege qarshi «eqsa topani» namliq keng kölemlik hujum qozghighanliqlirini élan qildi.

israiliye armiyesi bolsa, urush ayropilanliri bilen ghezze shehirige «tömür qilich herikiti» qozghighanliqlirini bildürüp, ghezzeni shiddetlik bombardiman qilishqa bashlidi.

israiliye dairiliri ghezzedin qilinghan hujumlarda 362 eskerni öz ichige alghan 1400 din artuq israiliyelikning ölgenlikini, 5 mingdin artuq kishining yarilanghanliqini uqturdi.

israiliye armiyesi bayanatchisi daniyal xagari, ghezzede hamasning herbiy qaniti bolghan qessam birigadilirining qolida 240 israiliyelik esirning barliqini bildürdi.

ghezzediki pelestin sehiye ministirliqi israiliyening hujumlirida 3648 bala we 2290 ayalni öz ichige alghan 8796 pelestinlikning qaza qilghanliqini, 22 ming 219 ademning yarilanghanliqini uqturdi.

ishghaliyet astidiki  iyordan deryasining gherbiy qirghiqida, israiliye küchliri bilen yehudiy köchmenlerning hujumlirida 130 pelestinlik jénidin ayrildi, texminen 2 ming pelestinlik yarilandi.

israiliye armiyesi 26 – öktebir küni ghezze rayonigha qaratqan quruqluq herikitining dairisini kéngeytishke bashlidi, hawa hujumlirini téximu köpeytti.

ghezzediki minglighan yaridar we puqralar dawaliniwatqan eng chong doxturxana bolghan «shipa doxturxanisi» mu israiliye armiyesining hujumigha uchridi.