t r t dunyagha dangliq yash mutexessislerni özara uchrashturdi

türkiye awazi radiyosi: 2017 - yildin bashlap dunyadiki muhim dunyawi mesililerni küntertipige élip kéliwatqan t r t  dunya munbirining yashlargha atap mexsus orunlashturghan «NEXT by TRT World Forum» öz sahesining dunyagha dangliq mutexessisliri we nurghun yashlarning ishtirak qilishi bilen  zorlu senet merkizide ötküzüldi. minglarche kishi ishtirak qilghan paaliyet jeryanida téxnikidin métawirsghiche,  NFT  séxidin alem sayahitigiche bolghan nurghun témilar muzakire qilindi.

2017 - yildin boyan dunyadiki muhim mesililer heqqide muhakime yürgüzüshke sehne hazirlap kéliwatqan «t r t dunya munbiri», öz saheliride özgirish peyda qilghan zhurnalistlar, akadémiklar, ammiwi teshkilatlarning ezaliri we igilik tikligüchiler sadalirini yangritip özara pikir almashturidighan yéngi bir supa tesis qildi. 14 - may shenbe küni zorlu senet merkizide ötküzülgen «NEXT by TRT World Forum» de, öz sahelirining mutexessisliri yashlar bilen uchriship, yashlarning kelgüsini shekillendürüshtiki küchi we roli toghrisida söhbetleshti.

t r t bash mudiri sobaji: « NEXT yashlar bilen we kelgüsini uchrashturidighan bir orunlashturush» dédi.

«métawérs we médiya: eng yéngi téxnika yüzlinishi axbaratchiliqqa qandaq tesir körsitidu?» namliq yighingha ishtirak qilip, yashlar bilen birlikte sözligüchilerning qarashlirigha qulaq salghan t r t bash mudiri mehmet zahid sobaji, yashlargha xitab qilip: « NEXTyashlar bilen kelgüsini özara uchrashturidighan bir orunlashturush. yashliq bilen kelgüsi bir yerge kelgende, uninggha choqum üchinchi bir uqumni qoshushimizgha toghra kélidu. u bolsimu, ümid uqumi. emeliyette, dunyaning omumiy ehwaligha qaraydighan bolsaq, mesililerning téximu sezgür nuqtida turuwatqanliqini körimiz. biz bu mesililerni hel qilish üchün bezi qararlarni chiqirishqa tirishiwatimiz,  kéngishish supisi qurmaqchi boluwatimiz, emma bir nersini qoldin bérip qoyuwatimiz. u bolsimu, muhim bayliq hésablinidighan yashlardur. shunglashqa biz NEXT  ni teshkilliduq, (diqqetni) yashlargha merkezleshtürmekchi bolduq. chünki yashliqta, yashlarning xaraktéride ijadchanliq, tesewwur, yéngiliq yaritish idiyesi we hayatiy küch bar. eger siz bu hayatiy küchni, ijadiy pikir we yéngiliq yaritish rohini mesililerni hel qilishqa musapisige qatnashturmisingiz, bügünki mesililerni hel qilishta téximu éghir qiyinchiliqqa duch kélisiz. shunglashqa, téxnologiyeni aldinqi ewladlargha qarighanda téximu ijadiy we mesile hel qilidighan shekilde ishlitidighan yashlarni bu bayraqning astigha toplashni qarar qilduq.

tarmaq yighinlarda «özgirish we tereqqiyat» amilining ehmiyiti tekitlendi

yersharimizning saqliniwatqan mesililiridin tartip alem sayahitigiche, téxnikining tereqqiy qilishidin tartip jemiyetlerning zawalliqqa yüzlinishigiche, haziriy istémal qiliniwatqan mezmunlardin tartip xizmet modéllirighiche bolghan nurghun soal we mesililer muhakime qilinghan  «NEXT by TRT World Forum» gha türkiye we dunyaning yash mutexessisliri qatnashti. yashlarning dunyaning özgirishige qoshidighan töhpisi alahide tekitlengen paaliyette «aktip puqraliq» uqumini tekitligen kishilerning biri «sosyalben» wexpining qurghuchisi eje chiftchi boldi.  «yashlar bolush süpitimiz bilen, öz dölitimiz üchün némini arzu qilsaq, dunya üchünmu oxshash nersini arzu qilimiz» dégen chiftchi, «hemkarliq»ning ehmiyitini tekitlidi.

dunyaning tunji métawérs qurghuchiliri jan yurdaqul, faysal u-k, sara eljamal we begüm aydinoghlu bolsa, métawérsning yéngi dunyaning shekillinishige qandaq tesir körsitidighanliqi toghrisidiki söhbet yighinigha qatnashti. métawérs arqiliq chégralarning buzup tashlinip, dunyaning téximu kéngeygenlikini bildürgen métawérs qurghuchiliri, yashlarning bu sahede qandaq ishlarni royapqa chiqarghanliqini ishtirakchilar bilen ortaqlashti.

kilimat kirizisi toghrisidiki «seyyare üchün sadayingni yangrat: yashlarning kilimat herikiti» namliq söhbet yighinigha barliq ishtirakchilar qiziqish bilen qatnashti. yash kilimat paaliyetchisi shyé bastida söhbet yighinida söz qilip: «men chonglarning közige qarap, ulargha <kelgüsimdin qorqushni xalimaymen> deymen. men 2050 - yili 1 milyon 200 ming kilimat musapirini körüshni xalimaymen. mene yene dunyaning %90 ini yashashqa bolmaydighan halette körüshni xalimaymen » dédi. yene shu yighinda söz qilghan néshad shafi: «bizning ereb yashlar kilimat herikitini qozghitishimizdiki seweb, rayondiki yashlarning awazini anglashtin ibaret. bezide yershari kilimat herikitini peqet aq tenliklerge xas bir ishtekla oylaymen. taratqular hemishe gherbtiki kilimat yighinlirigha ehmiyet béridu» dédi.

yashlargha NFT  din métawérsqiche bolghan nurghun témilar toghrisida tejribiler bayan qilip bérildi

asasiy sehnidiki yighinlardin bashqa, parallél sehnidilerdimu nurghun paaliyetler ötküzüldi.  NFT   séxidin reqemlik resimlergiche, alahide méhmanlar bilen élip bérilghan söhbetlerdin mewhum réalliqqiche bolghan nurghun nersilerni sinap tejribige ige bolghan yashlar, «NEXT by TRT World Forum»  sayisida hem özara, hem rayon hemde xelqara sewiyediki nurghun teshkilatlar bilen hemkarliq ornitishning huzurini sürdi.