hamas we islamiy jihad herikiti rehberliri téhranda körüshti

türkiye awazi radiyosi xewiri: pelestin islamiy qarshiliq körsitish herikiti — hamas we islamiy jihad herikiti, israiliye bilen ötküzülüwatqan wasitilik söhbetlerning muweppeqiyetlik bolushi üchün, sergerdanlargha aylanghan ghezzeliklerning öylirige qaytishni öz ichige alghan töt türlük shertning hazirlinishi kéreklikini otturigha qoydi.

hamas siyasiy biyurosi reisi ismail heniyye bilen islamiy jihad herikiti bash katipi ziyad ennehhale bashchiliqidiki wekiller ömekliri iranning paytexti téhranda körüshti.

hamas bayanat élan qilip, israiliye bilen ötküzülidighan herqandaq wasitilik söhbetning muweppeqiyetlik bolushi üchün, «ghezze hujumlirining pütünley toxtishi, ishghaliyetchi küchlerning u yerdin chékinishi, sergerdanlar (ghezzelik)ning choqum öylirige qaytishi we yardemlerning üzlüksiz kirishi» kéreklikini tekitlidi.

gherbiy qirghaq (iyordan deryasining gherbiy qirghiqi)tiki hujum bilen basturup kirip zerbe bérishler, quddus we mesjidi eqsadiki depsendichilikler nezerge élinghinida, pelestin xelqining israiliye bilen biwasite we ochuq toqunush halitide ikenliki tekitlengen bayanatta, bu rayonlarning hemmiside her xil qarshiliq usullirini qollinishning zörüriyiti tekitlendi.

bayanatta, islam ümmiti israiliye sadir qiliwatqan qirghinchiliqlargha bolghan ghezipini namayan qilishqa we qanunluq yollar arqiliq qarshiliqini ipadileshke chaqirildi.

bayanatta yene, ghezzege alaqidar xelqning iradisige qarshi yéngi weziyet yaritishni meqset qilghan pilan we türlerning ret qilinidighanliqi otturigha qoyuldi.