b d t ning pelestin alahide doklatchisi israiliyeni irqi qizghinchiliq bilen eyiblidi
birleshken döletler teshkilatining pelestin alahide doklatchisi firansiska albanise israiliyening pelestinliklerge qaratqan irqiy qirghinchiliqining holokost (chong qirghinchiliq) qa oxshiship kétidighanliqini éytti.
türkiye awazi radiyosi xewiri: b d t ning pelestin alahide doklatchisi albanise tunista ötküzülgen maghréb - meshriq munbiri yighinida söz qildi.
albanise israiliyening ghezze rayonigha qaratqan hujumlirini «insanperwerlik we démokratik qimmet qarashlargha ashkara urush élan qilghanliq» dep bahalidi we «hazir ghezzede yüz bériwatqan ishlarni qandaqmu körmeske salalaymiz? bu bir pajie» dédi.
albanise ghezzede yüz bériwatqan kishilik hoquq depsendichiliklirige hemmining diqqitini tartip, israiliyening ghezzede 15 ming kichik balini qoshqanda, texminen 35 ming kishini öltürgenlikini we bu hujumlar arqiliq öz nöwitide yene ishghaliyet astidiki sherqiy quddus we gherbiy qirghaqtiki barliq pelestinliklerdin intiqam élishni nishan qilghanliqini uqturdi.
israiliyening hujumlirini toxtitish üchün xelqara jamaetchilikni heriketke ötüshke chaqiriq qilghan albanise yene mundaq dédi:
«qilche ikkilenmestin éytalaymenki, ghezzede yüz bergen ishlar urush emes, belki bir irqiy qirghinchiliqtur. gerche gherb döletliri irqiy qirghinchiliq dégen sözni ishlitishtin her qanche biaram bolsimu, ghezzediki irqiy qirghinchiliq holokost (chong qirghinchiliq) qa oxshiship kétidu»
albanise sözide yene, israiliyening ghezzediki hujumlirigha qarshi ötküzüliwatqan namayishlar üstidimu toxtilip: «dunya miqyasida bu zulumni toxtitish üchün heriketke ötken we mekteplerde namayish qilish arqiliq hakimiyet sistémilirini tewritiwatqan oqughuchilar herikitini qollishimiz lazim» dédi.
