xitay bilen hindistan yéngi söhbet ötküzgen
xitay bilen hindistan himalayadiki talash-tartishliq chégra rayonliridiki ziddiyetni hel qilish üchün yéngi söhbet ötküzdi.
türkiye awazi radiyosi xewiri: xitay tashqi ishlar ministirliqi bayanat élan qilip, chégra ixtilaplirini hel qilish üchün élip bériliwatqan xitay-hindistan chégra mesilisi meslihet bérish we maslashturush xizmet méxanizmining 29-qétimliq yighinining paytext béyjingda ötküzülgenlikini xewer qildi.
bayanatta, ikki döletning tashqi ishlar, dölet mudapiesi, köchmenler we bashqa ministirliqlarning mesulliri qatnashqan yighinda, «chégradiki ehwal normal bashqurush we kontrol basquchigha ötüshini kapaletke ige qilish üchün, ikki terep qobul qilalaydighan pilanni baldurraq teyyarlash mesiliside pikir birlikige kelgenliki» bildürüldi.
hindistan tashqi ishlar ministirliqining bayanatida bolsa, «emeliy kontrol liniyesi (LAC) ning gherbidiki mesililerni hel qilish we özara chékinishni tamamlash toghrisida pikir almashturuldi» déyildi.
her ikki döletning bayanatida, tereplerning chégra rayonida tinchliq we xatirjemlikni saqlash üchün, diplomatik hemde herbiy yollar arqiliq daimliq alaqini saqlashning muhimliqi körsitildi.
xitay bilen hindistan otturisidiki himalaya téghi bilen qorshalghan éniq bolmighan chégra liniyesi, döletler otturisida igilik hoquqi majiralirigha seweb bolmaqta. éqin su, köl, muzluq we qarliq choqqilarni öz ichige alghan 3500 kiwadrat kilométirliq chégra, hemishe tereplerni bir-birige qarshi keltürmekte.
béyjing «jenubiy tibet» dep ataydighan hindistanning arunachal pradésh ölkisidiki 90 ming kiwadrat kilométirliq yerning igilik hoquqini telep qilsa, yéngi déhli aqsay-xitay égizlikini qaplighan 38 ming kiwadrat kilométirliq yerning xitay teripidin ishghal qilinghanliqini ilgiri sürüp kelmekte.
