ikreme sebri türkiye we erdoghangha yuqiri baha berdi

türkiye awazi radiyosi xewiri: quddus aliy islam heyiti bashliqi sheyx ikrime sebri jumhur reis erdoghangha yuqiri bahalarni bergen yazma bayanatida: «biz türkiye jumhur reisining toghra yoldiki ijabiy pozitsiyesini qedirleymiz. bu pozitsiye pelestin dewasining adalitige ishengen bir qelbtin kéliwatidu» dédi.

sheyx sebri türkiyening pelestin dewasigha munasiwetlik diplomatik we axbarat paaliyetlirining muhimliqini tilgha élip, pelestin xelqining heq-hoquqini we mesjidi eqsaning islamiy salahiyitini qoghdash yolidiki qedemlerni kücheytishni telep qildi.

u pelestin xelqige qaritilghan hujumni toxtitish we israiliyeni irqiy qirghinchiliq urushidin yaltaytidighan bir islamiy birlikni tesis üchün,  ereb we islam dunyasini türkiye bilen hemkarliq ornitishqa chaqirip, israiliyening pelestin xelqige qarshi bu urushida amérika we gherbning cheksiz qollishidin paydilanghanliqini tekitlidi.

sheyx sebri ereb we islam döletlirining israiliyeni qollawatqan döletlerge her xil bésimlarni ishlitishi kéreklikini eskertti we dunyaning herqaysi jayliridiki pelestin xelqini qollap namayish ötküzgen kishilerge salam yollidi.

jumhur reis erdoghan tünügün ötküzülgen parlaméntlar ara quddus munbirining 5-nöwetlik yighinidiki sözide: «pelestinlik qérindashlirimiz pütkül imkansizliqlargha qarimay, 203 kündin buyan yalghuz halitide qarshiliq körsitiwatqan mushundaq bir peytte héchkim bizning irqiy qirghinchiliqqa süküt qilishimizni kütmisun» dégenidi.