taliban «üch qoshna dölet»ni daéshni qollash bilen eyiblidi

türkiye awazi radiyosi xewiri: afghanistan taratquliridiki xewerlerge qarighanda, emirxan mutteqi paytext kabulda ötküzülgen ikkinchi nöwetlik afghanistan-qazaqistan yermenkisining échilish murasimidiki sözi jeryanida, dölitide yüz bergen térrorluq hujumliri heqqide toxtalghan.

qoshna üch döletning afghanistan we rayondiki daésh térrorluq teshkilatini qollawatqanliqini ilgiri sürgen mutteqi, ularning birining bu teshkilatni adem küchi bilen, yene birining terbiyelesh bilen, yene birining eshya oboroti bilen teminligenlikini bildürgen.

dölitide yüz bergen 10 qétimliq térrorluq hujumining «afghanistan sirtida» pilanlanghanliqini otturigha qoyghan mutteqi, munasiwetlik döletlerdin afghanistangha ziyan sélishni toxtitishni telep qilghan.

emirxan mutteqi «üch qoshna dölet»ning isimlirini tilgha almighan bolsimu, emma bezi afghanistan taratquliri mutteqining tajikistan, pakistan we iranni közde tutqanliqini, uning tajikistanni daéshni adem küchi bilen, pakistanning terbiyelesh bilen we iranning arqa sep teminati bilen teminligenlikini bildürgenlikini ilgiri sürgen.