йавропа иттипақи рәһбәрлири тоңлитилған русийә мал-мүлүклириниң киримини украина беришкә келишти
йавропа иттипақи комитети рәиси урсула вон дер лейен, иттипаққа әза дөләтләрниң рәһбәрлириниң тоңлитилған русийә мал-мүлкидин қилинған киримни украинаға бериш мәсилисидә бирдәклик һасил қилғанлиқини билдүрди.
түркийә авази радийоси хәвири: белгийәниң пайтәхти бирйусселда өткүзүлгән йавропа иттипақи башлиқлар йиғининиң биринчи күни ахирлашти؛ йавропа иттипақи комитети рәиси вон дер лейен йиғинниң ахирида өткүзүлгән мухбирларни күтүвелиш йиғинида, башлиқлар йиғининиң украинаға мунасивәтлик бөликиниң нәтиҗисини ортақлашти.
у рәһбәрләрниң йавропа иттипақиниң ташқи мунасивәт вә бихәтәрлик сийасити бойичә алий вәкили җосеп боррелниң <русийәниң йавропа иттипақи тәвәликидики тоңлитилған мал-мүлүклиридин қилинған киримни украинаға бериш> тоғрисидики тәклипиниң мувапиқ дәп қаралғанлиқини билдүрүп: «бу украинани һәрбий әслиһәләрни сетивелиш мәблиғи билән тәминләйду. 2024-йили 3 милйард йавро әтрапида, кәлгүси бир нәччә йилдиму йәнә мушунчилик мәбләғниң топлинишини мөлчәрлимәктимиз» деди.
вон дер лейен бу тәклипниң қачан йолға қойулидиғанлиқи тоғрисидики соалға: «мән рәһбәрләргә бу тәклипни дәрһал хуласилисәк, 7-айниң 1-күни алдинқи 1 милйард йаврони берәләйдиғанлиқимизни ейттим. демәк, бу иш бизгә бағлиқ. тез болсақ болиду, у (иш) бизниң қолимизда. йазда конкрет һәрикәт болиду» дәп җаваб бәрди.
