isirailiye ministiri: esirlerning hemmisini tirik qayturup kélish wedisi toghra emes
isirailiyening ashqun ongchi maliye ministiri bézalél smotrich ghezzede herbiy hakimiyet ornitilidighanliqini bildürdi.
türkiye awazi radiyosi xewiri: isirailiyening ashqun ongchi maliye ministiri bézalél smotrich «12-qanal» téléwiziyesining ziyaritini qobul qilghanda, armiyening ghezzede herbiy hakimiyet ornitip, rayonni kontrol qilidighanliqini bildürdi.
u sözide, ichki kabént ezalirining isirailiye armiyesining ghezzede turushi kérekliki toghrisida oxshash pikirge ige ikenlikini ilgiri sürdi.
u özining we bashqa ichki kabént ezalirining b d t ning «ottura sherqtiki pelestinlik musapirlargha yardem qilish agéntliqi» arqiliq pelestinliklerge yardem yetküzüshige qarshi chiqqanliqini eskertip, pelestinliklerge insanperwerlik yardem tarqitish ishlirining isirailiyening kontrolluqi astida bolushi kéreklikini tekitlidi.
u isirailiyelik esirler üstide toxtalghanda, esirlerning hemmisini tirik qayturup kélish toghrisida bérilgen wedilerning emeliyetke uyghun emeslikini bildürdi.
u isirailiyelik esirlerning aililiri we yéqin-yoruqlirigha bu pikirni yetküzgenliklirini eskertip: «kishining közining ichige qarap turup esirlerning hemmisini tirik qayturup kélish toghrisida wede bergen kishi, toghra gep qilmighan bolidu» dédi.
u esir aililiri we yéqinlirining hökümetni derhal esir almashturush kélishimi tüzüshke chaqirip ötküzgen namayishlarning, esirlerni tirik qayturup kélish éhtimalini ajizlatqanliqini qeyt qildi.