yérapétritis: türkiye bilen söhbet ötküzüsh intayin muhim

türkiye awazi radiyosi xewiri: girétsiye tashqi ishlar ministiri yorgos yérapétritis «skay téléwiziyesi»ning girétsiyening türkiye we amérika qoshma ishtatliri bilen bolghan munasiwetliri toghrisidiki soallirigha jawab bérip, türkiye bilen söhbetlishishning intayin muhimliqini otturigha qoydi.

girétsiyening F-35 pirogrammisigha qatnishishni iltimas qilghanliqini eskertken yérapétritis, amérika diplomatiyesi, siyasiti we mudapie ishlirigha munasiwetlik qararning amérikagha tewe ikenlikini tekitlep: «bizning izchil arzu qilghinimiz, bir mudapie ittipaqi, bolupmu nato ramkisi ichide térritoriye pütünlüki we xelqara qanungha hörmet qilish. bir döletke bérilgen her qandaq bir qoralni ittipaqdash bir döletke qarshi ishlitishke bolmaydu» dédi.

girétsiyege nsibeten «lozan shertnamisi»ge tüzitish kirgüzüshning mumkin emeslikini otturigha qoyghan  yérapétritis: «xelqara qanun chégrani belgileydighan her qandaq kélishimning tüzitilishige yol qoymaydu» dédi.

u yéqinqi aylarda türkiye bilen girétsiyening diyalog ornitish yolida zor tirishchanliq körsitiwatqanliqini tekitlep: «bizning igilik hoquq barawerliki sharaitida söhbetliship, köz qarishimizni ipadiliyelishimiz intayin muhim. her bir girétsiye puqrasi tinch yashashning neqeder muhimliqini bilidu. bu intayin muhim» dégenlerni qeyt qildi.

türkiyening ezeldin girétsiyening igilik hoquqi mesilisige munasiwetlik bir mesilini otturigha qoymighanliqini tekitligen yérapétritis, türkiyening yene qanunsiz köchmenlerge qarshi turush üchün, muhim tedbirlerni qollanghanliqini qeyt qildi.

girétsiyening iqtisadiy kirizis mezgilidiki qorallinish pirogrammisining arqida qalghanliqini otturigha qoyghan yérapétritis, hökümetning kirizistin kéyin bu boshluqni toluqlashqa tirishqanliqini eskertip: «bizde urush yaki düshmenlishish xahishi yoq, biz ezeldin keng qorsaq xelq, tinch yashashni xalaymiz, emma bixeterlikimizge kapaletlik qilishnimu xalaymiz» dégenlerni sözlirige ilawe qildi.