israiliyening wehshiyane hujumi ghezzeni kolliktip qebristanliqqa aylandurush aldida turidu

türkiye awazi radiyosi xewiri: ghezzediki sehiye ministirliqi bu heqte yazma bayanat élan qildi.

bayanatta, israiliyening yéqinqi 24 saet ichidiki hujumlirida 201 pelestinlikning öltürülgenliki we 368 kishining yarilanghanliqi, 7 - öktebirdin buyan dawamlashqan hujumlarda öltürülgenler sanining 20 ming 258 ge  we yarilanghanlar sanining 53 ming 688 ge örligenliki bildürüldi.

birleshken döletler teshkilati balilar fondi teripdin élan qilinghan bayanatta,  israiliyening ghezzediki hujumlirini dawamlashturiwatqanliqi, ghezzede «acharchiliq» ning «jiddiy halet sewiyesi» ge yetkenliki we 5 yashtin töwen 335 ming kichik balining ozuqluq yétishmeslik sewebidin ölüp kétish xewpige duch kelgenliki uqturuldi.

yawropa-aq déngiz kishilik hoquqni közitish teshkilati (yawro-méd) ning doklat qilishiche, shahitlarning bayanlirigha asaslanghanda, israiliye qisimlirining ghezzede 60 yashtin yuqiri nurghun kishini qesten öltürgenliki ashkarilanghan.

israiliye ghezze rayonida 78 kündin béri dawamlashturiwatqan irqiy qirghinchiliqi jeryanida, pelestinning medeniyet miraslirighimu hujum qilghandin sirt, hazirghiche kem dégende 13 ghezze shairi we yazghuchilirini öltürgen. israiliyening ghezzediki hujumlirida qaza qilghan zhurnalistlarning sani 101 ge yetken.

yéqin sherqtiki pelestinlik panahlanghuchilargha yardem bérish xizmet orginining mudiri tomas wayt organning X ijtimaiy alaqe torida élan qilghan yazmisida, siyasiy söhbet shertlirini qoymastin, derhal ghezze rayonida insanperwerlik urush toxtitish we yardem  yetküzüshke jiddiy éhtiyaj barliqini bildürdi.

tomas wayt, «ghezzediki xelq shahmat taxtisidiki pichkilar emes, ularning köpinchisi ilgirimu bir nechche qétim öy-makanliridin ayrildi. kishilerning baridighan yéri yoq, bixeter jayi yoq» dédi.

israiliyening 7 - öktebirdin buyan ghezzede dawamlashturiwatqan wehshiyane hujumlirida 55 ming öy pütünley weyran boldi we 23 doxturxana xizmettin toxtap ketti. pelestin tashqi ishlar ministirliqi bolsa, israiliye hökümitini birleshken döletler teshkilati xewpsizlik kéngishining ghezze rayonigha insanperwerlik yardem yetküzüsh toghrisidiki 2720 - nomurluq qararining ijra qilinishigha tosqunluq qilishqa urunush bilen eyiblidi.

ghezze rayonida urushni axirlashturush we derhal urush toxtitishqa kapaletlik qilish üchün b d t  xewpsizlik kéngishida qarar maqullinishi üchün körsitiliwatqan xelqaraliq tirishchanliqlarni kücheytish kérekliki telep qilinghan bayanatta yene, israiliyening ghezzening pütkül rayonini yalghuz ölükler üchünla emes, belki térikler üchünmu ammiwi qebristanliqqa aylandurüshigha az qalghanliqi  eskertilip alahide agahlanduruldi.