sténméér qatar ayrodurumida yérim saet saqlitildi
gérmaniye pirézidénti firank waltér stéynméyérning töt künlük ottura sherq ziyaritining axirqi békiti qatarda ayropilanda yérim saet saqlitip qoyulghanliqi ilgiri sürüldi.
türkiye awazi radiyosi xewiri: gérmaniye taratqulirining xewerlirige qarighanda, stéynméyér tünügün ayropilan bilen doha ayrodurumigha qonghan, emma ayrodurumda uni kütüwalidighan qatar emeldari bolmighachqa, yérim saet etrapida saqlashqa mejbur bolghan.
ijtimaiy taratqulardiki körünüshlerde, stéynméyérning ayropilanning chiqish éghizi aldida saqlap turghanliqini körgili bolidu.
stéynméyérning saqlitilishi qatarning gérmaniyening ghezze siyasitige bolghan naraziliqini arqa körünüsh qilishi mumkin, dégen analizlarning otturigha chiqishigha seweb boldi.
stéynméyérning repiqisi élké bündénbérdér we bashqa wekiller ömikining ayropilandin burunla chüshüp ketkenliki tekitlendi.
qatarning tashqi ishlargha mesul dölet ishliri ministiri sultan bin seid al mureyxi teripidin kütüwélinghan stéynméyérning, qatar emiri sheyx temim bin hemed al sani bilen ötküzidighan uchrishishigha del waqtida yétip barghanliqi qeyt qilindi.
