yaponiye bilen kanadamu ghezzede urush toxtitishni chaqiriq qildi
yaponiye hökümiti isirailiyening hujumliri dawamlishiwatqan ghezzediki insaniy kirizisni hel qilish meqsitide, yémek-ichmek, su, tibbiy malzimiler we yéqilghu bilen teminleshning tosalghugha uchrimasliqi üchün derhal heriketke ötüshni chaqiriq qildi.
türkiye awazi radiyosi xewiri: yaponiye tashqi ishlar weziri kamikawa yoko tokyoda ötküzülgen axbarat élan qilish yighinida, G7 tashqi ishlar ministirliri yighinida ghezzege munasiwetlik qilinghan chaqiriqlarni xatiriletti.
u ghezzediki insaniy kirizisni hel qilish meqsitide, yémek-ichmek, su, tibbiy malzimiler we yéqilghu bilen teminleshning tosalghugha uchrimasliqi üchün derhal heriketke ötüshni tekitlep, barliq tereplerning xelqaraliq qanungha muwapiq heriket qilishi kéreklikini eskertti.
u yene, buning üchün insanperwerlik nuqtisidin urushni waqitliq toxtitishni we insanperwerlik karidori échish kéreklikinimu tekitlidi.
u yaponiyening G7 döletliri we xelqaraliq teshkilatlar bilen birlikte rayonda insaniy weziyetning yaxshilinishi üchün diplomatik tirishchanliqlirini dawamlashturidighanliqini qeyt qildi.
kanada hökümitimu isirailiyeni iyordan deryasining gherbiy qirghiqida yehudiy köchmenlerning pelestinliklerge qiliwatqan zorawanliqlirini toxtitish üchün derhal heriketke ötüshke chaqirdi.
kanada tashqi ishlar ministirliqi yazma bayanat élan qilip, iyordan deryasining gherbiy qirghiqida pelestinliklerning mejburiy yurt-makanliridin köchürülgenlikidin chongqur endishe qiliniwatqanliqini bildürdi.
bayanatta mundaq déyildi:
«kanada isirailiye hökümitini yehudiy köchmenlirining zorawanliqini toxtitishqa, pelestin xelqining qoghdilishi üchün derhal heriketke ötüshke chaqiridu.»
amérika kéngesh palatasining orégon ishtatidin saylanghan démokratchi ezasi jéf mérkléymu ghezzede urush toxtitishni chaqiriq qilip: «ghezzede puqralarning ölümi kishini chöchütidighan sewiyede éshiwatqan bir waqitta, orégon xelqini öz ichige alghan nurghun amérika xelqi qirghinchiliqning toxtitilishi üchün awazini yuqiri kötürdi. menmu bu pikirge qoshulimen we bu sewebtin tereplerni urush toxtitishqa chaqirimen» dédi.
hamasning herbiy qaniti bolghan qassam birigadiliri 7-öktebir (2023) «eqsa topani» namliq keng kölemlik hujum bashlighanliqini élan qilghan idi.
isirailiye armiyesimu buninggha jawaben «tömür qilich herikiti» ni bashlighanliqini élan qilghan idi.
künséri keskinleshken toqunushlarda, 13 mingdin artuq pelestinlik jénidin ayrildi. bularning ichide köpinchisi kichik balilar.