makron shi jinping bilen ghezze weziyiti toghrisida sözleshti
xitay dölet reisi shi jinping bilen firansiye pirézidénti émmanuél makron, israiliye - pelestin toqunushidin qutulushning asasliq yolining ikki döletlik hel qilish charisi ikenlikini tekitlidi.
türkiye awazi radiyosi xewiri: xitay tashqi ishlar ministirliqi bayanat élan qilip, xitay dölet reisi shi jinping bilen firansiye pirézidénti émmanuél makronning israiliyening hujumliri astidiki ghezze weziyiti we pelestin mesilisi toghrisida téléfon söhbiti ötküzgenlikini uqturdi.
bayanatta körsitilishiche, shi bilen makron, israiliye-pelestin toqunushining barghanséri yamanliship, téximu éghir insaniy kirizis peyda qilishining aldini élishning texirsiz ish ikenlikige ishinidighanliqlirini tilgha élip: «ikki döletlik hel qilish charisi israiliye – pelestin toqunushni hel qilishning asasliq yoli» dégen.
ikki rehberning téléfon söhbiti bezi ereb we islam döletliri tashqi ishlar ministirliri hemde islam hemkarliq teshkilati bash katipidin terkib tapqan wekiller ömikining xitay ziyaritige toghra keldi.
seudi erebistan tashqi ishlar ministiri feysal bin ferhan, iyordaniye tashqi ishlar ministiri eymen essefedi, misir tashqi ishlar ministiri semih shükri, hindonéziye tashqi ishlar ministiri rétno marsudi, pelestin tashqi ishlar ministiri riyad elmaliki we islam hemkarliq teshkilati bash katipi hüseyin ibrahim taha qatarliqlardin terkib tapqan wekiller ömiki tünügün xitay tashqi ishlar ministiri wang yi bilen körüshkenidi.
béyjingda ötküzülgen yighinda, herqaysi terepler xelqara jemiyetni israiliye-pelestin toqunushini axirlashturup, ghezzediki insaniy kirizisining aldini élishqa chaqirghanidi.
birleshken döletler teshkilati xewpsizlik kéngishining besh daimiy ezasini öz ichige alghan ziyaretlerning birinchi békiti béyjingda uchrishishlarni ötküzgen wekiller ömiki, firansiye, engliye, rusiye we amérika qoshma ishtatlirinimu ziyaret qilidu.
