xelqara jemiyet israiliyening ghezze hujumlirigha naraziliq bildürmekte

türkiye awazi radiyosi xewiri: amérika pirézidénti jo baydin muxbirlarning <israiliye armiyesining doxturxanilargha qiliwatqan hujumliri> toghrisidiki soaligha «doxturxanilargha arilishishlarning téximu az bolushi arzuyum we ümidimdur» dep jawab bérish bilenla kupayilendi.

aqsaray dölet bixeterlik ishliri meslihetchisi jéyk sulliwanmu doxturxanilarda qoralliq toqunushlarning yüz bérishini körüshni xalimaydighanliqini éytti.

sulliwan yene esirlerni qutquzush üchün, toqunushlarning téximu uzun toxtitilishini arzu qilidighanliqini bildürdi.

amérika tashqi ishlar ministirliqi bayanatchisi matéw millér,  washingtonning pelestinliklerning ghezzediki ziyankeshlikke uchraydighan rayonlardin tarqaqlashturulushini qollaydighanliqini, emma ularning ghezzedin mejburiy köchürülüshini qollimaydighanliqini eskertti.

israiliyening doxturxanilargha qiliwatqan hujumliri engliye bash weziri rishi sunakningmu küntertipide idi؛ u, israiliyening xelqara qanunlargha boysunup, bigunah puqralarni qoghdash üchün barliq tedbirlerni yolgha qoyushi kéreklikini tekitlidi.

engliyediki anglikan chérkawimu sunaqqa qarighanda téximu keskin ibarilerni ishlitip bayanat élan qildi؛anglikan chérkawi rehbiri jastin wélbi, israiliyening puqralarni öltürüshini exlaqiy jehettin aqlighili bolmaydighanliqini tekitlidi hemde urush toxtitish chaqiriqlirigha «exlaqiy nida» dep baha bérip: «emdi yéter, adem ölüsh ehwalliri toxtisun» dédi.

iyordaniyemu israiliyege eng qattiq naraziliq bildürgen döletlerning biri boldi؛ iyordaniye tashqi ishlar ministiri eymen essefedi: «biz barliq qizil siziqlarni bésip ötken bir israiliye hökümitige duch kelduq» dédi we sözini dawamlashturup, israiliye hökümitining xelqara qanunning barliq qaidilirige xilapliq qilghanliqini otturigha qoydi.

girétsiye bash ministiri kiriyakos michotakismu yawropa bilen türkiyening ghezzediki toqunushlarning ulghiyip ketmesliki mesilisidiki menpeetlirining ortaq ikenlikini eskertti éytti.

pelestin islamiy qarshiliq körsitish herikiti — hamasning herbiy qaniti bolghan qessam birigadasi 7-öktebir israiliyening pelestinliklerning hoquqi we mesjidi eqsani öz ichige alghan muqeddes qimmetlerni izchil halda ayagh asti qiliwatqanliqigha naraziliq bildürüsh üchün, «eqsa topani» namliq keng kölemlik hujum qozghighanliqini jakarlighan. israiliye armiyesimu urush ayropilanlirini ishlitip ghezzeni bombardiman qilishni bashlighanidi.

künséri küchiyiwatqan toqunush we bombardimanlar jeryanida, her ikki tereptin minglarche kishi hayatidin ayrildi.