israiliye ghezzeni bombardiman qilishni dawamlashturmaqta

türkiye awazi radiyosi xewiri: israiliye ghezzediki doxturxanilar qatarliq nurghun puqrawi orunlargha hawa we quruqluqtin hujum qildi.

pelestin xewer agéntliqi — wafaning xewirige qarighanda, ghezzening gherbiy shimalidiki shifa we hindonéziye doxturxanilirining etrapi bilen ghezzening gherbiy shimalidiki rimal, sheyx ridwan we nasir mehelliliri hemde eshshati musapirlar lagéridiki puqralar turuwatqan öyler israiliye ayropilanliri we zembirekchi qisimlirining hujumigha uchrighan.

ghezzediki sehiye ministirliqi bash diréktori qatarning eljezire qaniligha bayanat bérip: ««shifa doxturxanisining etrapidiki rayonlar üch kündin béri üzlüksiz bombardiman qilinmaqta. rayon israiliye armiyesining quruqluq bilen doxturxanigha kirishi üchün, her minutta dégüdek shiddetlik bombardiman qiliniwatidu» dédi.

u yene, israiliye hujumlirining qutquzush mashinilirining shifa doxturxanisigha kirip-chiqishigha tosqunluq qiliwatqanliqini we doxturxanining qamal qilinghanliqini bildürdi.

israiliye armiyesi bügün kéchimu ishghaliyet astidiki gherbiy qirghaq(iyordan deryasining gherbiy qirghiqi)ning nurghun sheherliride basturup kirip tekshürüsh heriketlirini élip bardi.

wafaning xewirige qarighanda, israiliye armiyesi basturup kirgen jaylar ichide nablus, elxelil, ramallah we beytlehem we jénin qatarliq sheherler bar iken.

pelestinlikler jéninning jenubidiki silezzehr baziridiki basturup kirish herikitige oq chiqirip inkas qayturghan bolup, toqunushlar hazirmu dawamlashmaqta iken.

israiliye armiyesining nablusning jenubi we sherqidiki öylerge bésip kirishi jeryanida toqunush yüz berdi.

oxshashla, elxelil shehirining yatta baziri, ramallahtiki jelezun musapirlar lagéri we beytlehemdiki beyt fujjar baziridimu basturup kirip qolgha élish weqelirining yüz bergenliki bildürüldi, emma adem ölüsh ehwalining körülüp – körülmigenliki heqqide melumat bérilmidi.

buningdin bashqa, gherbiy qirghaqning oxshimighan jaylirida ghezzeni qollash namayishi ötküzüldi.

birleshken döletler teshkilati xelqara balilar fondi yazma bayanat élan qilip, ghezzening, bolupmu shimaliy qismining sehiye sistémisining pütünley yimirilishi we mulazimetning kemchil bolushining balilarning hayatigha tehdit élip kéliwatqanliqini bildürdi.

rantisi we nasir balilar doxturxanilirining nurghun qétim bombardimangha uchrighanliqigha isharet qilinghan bayanatta, yéqinqi 24 saet ichide bu doxturxanilarning merkezlik közitish we balilar merkezlik közitish orunliridin bashqa héchqandaq bölümning mulazimet qilalmighanliqi qeyt qilindi.

pelestin islamiy qarshiliq körsitish herikiti — hamasning herbiy qaniti bolghan qessam birigadasi 7-öktebir israiliyege «eqsa topani» namliq keng kölemlik hujum qozghighanliqini jakarlighan. arqidin israiliye armiyesi urush ayropilanliri bilen ghezzege qarshi «tömür qilich» herikitini bashlighanliqini élan qilghanidi.