yawropa ittipaqi gherbiy qirghaqtiki «yehudiy térrorluqi» toghrisida agahlandurush élan qildi

türkiye awazi radiyosi xewiri: yawropa ittipaqi tashqi munasiwet we bixeterlik siyasiti aliy wekili josép borrélning ishxanisi teripidin élan qilinghan bayanatta: «gherbiy qirghaqtiki yehudiy köchmenlerning térrorluqining ewj élishi tüpeylidin nurghun pelestin puqraliri jénidin ayrildi we nurghun pelestinlikler öy-makanliridin qéchishqa mejbur boldi» déyildi.

bayanatta: «bu ehwal kontroldin chiqip kétishi mumkin we yerlik ahaliler üchün tesewwur qilghusiz azab-oqubetlerni keltürüp chiqirishi mumkin. tézlikte muhim tedbirlerni yolgha qoyush kérek» déyildi.

bayanatta, israiliyening gherbiy qirghaqtiki puqralarni ashqun (yehudiy) köchmenlerning zorawanliqidin qoghdash, jinayetchilerni jawabkarliqqa tartish we israiliye armiyesining buni tosush mejburiyiting barliqi tekitlendi we buning qanuniy mejburiyet ikenliki eskertildi.

bayanatta yene mundaq déyildi:

«bu ehwal ghezzediki burundinla mewjut bolghan échinishliq weziyetni téximu tiragédiyelik halgha keltürmekte we xeterlik shekilde toqunushning keskinlishish xewpini ashurmaqta. her qandaq bedel töleshtin qatiynezer bu ishlardin saqlinish lazim.»

ishghaliyet asitdiki gherbiy qirghaqta 7 – öktebir (2023) din buyan israiliye qisimliri we yehudiy ashqun köchmenlirining hujumida öltürülgen pelestinliklerning sani 126 ge yetti.

israiliye qisimlirining qoghdishi astida (ishghaliyet rayonigha) olturaqlashqan yehudiylar 7-öktebirdin buyan ishghaliyet astidiki gherbiy qirghaq we quddusta pelestinliklerge hemde ularning mal-mülüklirige bir qanche yüz qétim hujum qilghan idi.