ereb elliri xelqara jemiyetni ghezze üchün derhal heriketke ötüshke chaqirdi

türkiye awazi radiyosi xewiri: birleshken döletler teshkilati xewpsizlik kéngishide pelestin mesilisi toghriliq chaqirilghan yighinda, misir, seudi erebistan, iyordaniye we aljiriye tashqi ishlar ministirliri söz qildi.

misir tashqi ishlar ministiri samih shükri: «ghezze rayoni üchün derhal, shertsiz urush toxtitilishi kérek» dédi.

seudi erebistan tashqi ishlar weziri feysel bin ferhan mundaq dédi: «hazirgha qeder bizning shahit boluwatqiminiz؛ xelqara jemiyetning israiliye armiyesining ghezze ahalilirini omumyüzlük jazalandurushi we öy – makanliridin mejburiy halda köchürüwétishning aldini alalmasliqidur. bu bolsa bizni hemmimiz arzu qiliwatqan bixeterlik we muqimliqtin téximu yiraqlashturuwetmekte. xewpsizlik kéngishining süküt qilip turushini qobul qilghili bolmaydu. israiliye armiyesining herbiy herikitini toxtitish,  puqralarni qoghdash, ghezzege qaritilghan  qamalning bikar qilinishi we insanperwerlik yardem buyumlirining ghezze rayonigha kirishige kapaletlik qilish üchün, xewpsizlik kéngishi heriketke ötüshke tégishlik waqit alliqachan yétip keldi.»

iyordaniye tashqi ishlar weziri eyman essefidi mundaq dédi: «israiliyening ghezzeni ishghal qilishi keltürüp chiqarghan we téximu chongqurlashturuwetken kirizis, taki ishghaliyet axirlashlangha qeder qoshna döletlerge dawamliq tesir körsitidu. shundaqla bu bizning dölet bixeterlikimizge tehdit hésablinidu, shunga biz pütün küchimiz bilen buninggha qarshi turimiz.»

aljiriye diplomatiye ministiri ehmed ettaf mundaq dédi: «pütkül dunya xewpsizlik kéngishining qisqa waqit ichide ghezze rayonidiki naheq qorshawni bikar qilishini, israiliyening ghezze ahalisini qalaymiqan bombardiman qilishini we pelestinliklerning öy – makanliridin ayrilip qélishini toxtitishini töt köz bilen kütmekte.»