israiliye ghezzege hujum bashlighandin buyan 2215 kishini öltürdi
israiliyening qorshawi astidiki ghezzege qilghan hujumida hazirgha qeder 2215 kishi öltürüldi.
türkiye awazi radyosi xewiri: israiliye qisimliri 8 kündin buyan ghezzediki olturaq rayonlarni qattiq bombardiman qilishni dawamlashturmaqta.
ghezze rayonining shimalidiki jibaliye panahlanghuchilar lagéri, beyt lahye we ottura qismidiki nusayrat panahlanghuchilar lagéri qatarliq xelq zich olturaqlashqan rayonlar qattiq bombardiman qilindi.
israiliye qisimliri jibaliye panahlanghuchilar lagéridiki bir öyni nishan qilghan hujumda, kem dégende 20 kishi qaza qilip, 80 kishi yarilandi.
ghezzediki sehiye ministirliqining yazma bayanatigha asaslanghanda, israiliyening ghezzede bir kün ichidila élip barghan hujumlirida 315 pelestinlik jénidin ayrilghan. 8 kündin buyan toxtimay dawamlishiwatqan qattiq bombardimanda jemiy 2 ming 215 kishi ölüp, 8 ming 714 kishi yarilanghan.
ministirliqning bayanatida, israiliye hujumida qaza qilghanlardin 724 nepirining kichik bala we 458 nepirining ayallar ikenliki uqturuldi.
shifa doxturxanisining bash dériktori muhemmed ebu selime israiliyening hawa hujumidin qéchip chiqqan 35 ming pelestinlikning öylirini tashlap, shifa doxturxanisi we etrapida panahlanghanliqini bildürdi.
