xitay yaponiyening qararigha naraziliq bildürdi

türkiye awazi radiyosi xewiri: xitay tashqi ishlar ministirliqining bayanatigha qarighanda, muawin ministir sun wéydong yaponiyening béyjingda turushluq bash elchisi tarumi hidéyoni bu mesile toghrisida ministirliqqa chaqirghan.

sun körüshüshte, yaponiyening qararini «shexsiyetchilik we mesuliyetsizlik» dep naraziliq bildürdi.

u mezkur qarar bilen yaponiyening öz menpeetini qoshna döletlerning endishesining aldigha qoyghanliqini ipadilep, xitayning déngiz-okyan ékologiyesi, yémek-ichmek bixeterliki we xelq saqliqini qoghdash üchün zörür tedbirlerni yolgha qoyidighanliqi toghrisida agahlandurdi.

yaponiye elchixanisi bu heqtiki bayanatida, bash elchi tarumimu körüshüshte hökümetning paskina su qoyup bérish pilanini ochuq-ashkara we ilmiy usulda chüshendürgenlikini, xitayning bu mesilidiki étirazlirining ilmiy asasi yoqluqini bildürdi.

bayanatta, bash elchi tarumining yawropa ittipaqi we bashqa iqtisadiy gewdilerning yaponiyedin su we yémek-ichmek mehsulatlirigha bolghan kontrolluqni bikar qilghanliqini eskertip, xitayning bu toghrida qedem basqan yalghuz dölet ikenlikini, ularning ilmiy asasi bolmighan bundaq tedbirlirini qobul qilmaydighanliqlirini tekitlidi.

yaponiye bash weziri kishida fumiyo tünügün (22-awghust) kabinét yighinidin kéyin élan qilghan bayanatida, fukushima daychi yadro éléktr istansisining radiyaktipliq paskina süyining déngiz-okyangha qoyup bérilidighanliqini uqturghan idi.

xelqara atom énérgiyesi orgini 4-iyul (2023) éléktr istansisidiki tekshürüshlerdin kéyin doklat élan qilip, yaponiyening paskina su qoyup bérish pilanining bixeterlik ölchimige mas kélidighanliqini bildürgen idi.

2011-yili martta yüz bergen 9 bal yer tewreshtin kéyin otturigha chiqqan déngiz tashqini fukushima daychi yadro éléktr istansisidiki töt yadro réaktorining üchi buzghunchiliqqa uchrap, yadro éléktr istansisining etrapi «tarqaqlashturush rayoni» dep élan qilinghan idi.