pirézidént baydin qurban héytni tebriklidi

türkiye awazi radiyosi xewiri: amérika pirézidénti jo baydin amérika hemde dunyaning oxshimighan jaylirida yashawatqan musulmanlarning qurban héytini tebriklep, tebrik télégrammisi élan qildi.

u bu yil (2023) aqsarayda birinchi qétim muawin pirézidént kaméla xarrés we yoldishining sahibxanliqida, musulman jemiyetlirining rehberliri bilen bir yerge jem bolghan halda qurban héytni tebrikleydighanliqlirini bildürüp, amérikaning medeniyet bayliqini téximu béyitqan we jemiyetke töhpe qoshqan  milyonlarche musulmanlarni kütüwélishtin sherep hés qilidighanliqlirini qeyt qildi.

u amérikaliq musulmanlarning oxshimighan sahelerde döletke töhpe qoshuwatqanliqini eskertip: «ularning bu yerde yashishi, xilmu xilliqimizni, sighdurushchanliqimizni we diniy erkinliklerge bolghan wedimizni téximu kücheytidu» dédi.

u méhir-shepqet, bashqilarni toghra chüshinish we özara hörmet qilishni tekitlep, qurban héytta ada qilinidighan hej ibaditi toghrisidimu toxtaldi.

u mundaq dédi: «bu héytta, dunyaning her qaysi jayliridin kelgen nurghun musulmanlar seudi erebistanda hej ibaditini ada qiliwatidu. ular hej üchün bir yerge jem bolup, aq renglik éhramni kiyip, insanlarning teng-barawerlikini namayan qiliwatidu. bu idiye, dölitimiz üstige qurulghan hemmimiz barawer yaritilghan, biz yashash, erkinlik we bext qoghlishish heq-hoquqigha ige, dégen idiyege oxshaydu. qurban héyt qelbinglargha we öyünglargha xushalliq, tinchliq, inaq-ittipaqliq élip kelsun. biz hej ibaditini ada qilghan amérikaliq hajimlarni dölitimizde qarshi élish üchün töt köz bilen kütimiz. biz ularning we dunyaning bashqa jayliridiki barliq musulmanlarning héytni xushal we tinch ötküzüshige tilekdashmiz. qurban héytinglar mubarek bolsun!»

amérika tashqi ishlar ministiri antoni blinkénmu twittérda uchur hembehrlep, musulman dunyasining qurban héytini tebriklidi, hej ibaditini qiliwatqan musulmanlargha yaxshi tileklirini bildürdi.