shiwiyétsariyede erdoghan we türkiye bayriqigha qarshi ighwagerchilik qilindi
shiwiyétsariyening zurix shehiride dölitimiz (türkiye jumhuriyiti) jumhur reisi rejep tayyip erdoghan we türkiye bayriqigha qarshi ighwagerchilik qilish namayishi ötküzüldi.
türkiye awazi radiyosi xewiri : shiwiyétsariyede «zurix inqilabiy heriket kolléktipi» namliq guruppa zurix shehiridiki UBS bankisining aldida jumhur reis erdoghangha oxshaydighan qorchaq we türkiye bayriqini köydürdi.
shiwiyétsariyediki minglighan kishiler teshkilligen «ayallar hoquqini qoghdighuchilarning ish tashlishi» namayishigha singip kirgen bu guruppa UBS bankisining aldida ighwagerchilik qilish harpisida «erdoghanni öltürüng» dégen xet yézilghan wiwiskinimu kötürdi.
bu wiwiska bilen jumhur reis erdoghangha oxshaydighan qorchaqni ammiwi ortaqlishish tor béti Instagram sehipiside hembehirligen bu guruppa yene, ammiwi ortaqlishish tor béti Twitter sehipisidimu jumhur reis erdoghangha oxshaydighan qorchaq köydürüwétilgen bir widéonimu tarqatti.
melumatlargha qarighanda, shiwiyétsariye saqchiliri bu namayishtin özlirining xewersiz ikenlikini we ruxsetsiz ötküzülgenlikini ilgiri sürgen.
bu ighwagerchilik qilmishigha qarita, türkiyening bérn elchixanisi we zurix konsulxanisining shiwiyétsariye fédératsiye sot mehkimiliridiki naraziliq teshebbusliri dawamlashmaqta.
2017-yili 25-mart küni, shiwiyétsariyening paytexti bérndiki fédératsiye parlaméntining aldidiki parlamént meydanida ötküzülgen «xalimaymiz» namayishida, qara teglik wiwiskigha erdoghanning béshigha miltiq tenglengen süriti chüshürlgen we «erdoghanni öltürüng» dégen xet yézilghan, bu wiwiskining astigha bolsa «öz qoralliri bilen» ibarisi qisturulghanidi.
bu wiwiskini kötürgen jawabkarlar üstidin sot mehkimisige erz sunulghan, 2022-yili 1-ayning 18-küni bashlanghan sotta, sotchi 9-mart küni töt jawabkarni gunahsiz dep höküm chiqarghanidi.
2022-yili 8-ayda, bérn bash teptish mehkimisining bayanatchisi bérn rayonluq sot mehkimisidiki sotta, mezkur jawabkarlar üstidin «gunahsiz» dep höküm chiqirilishigha étiraz bildürülüp aliy sot mehkimisige erz sunulghanliqini uqturghanidi.
