ukrainada kaxowka su éléktr istansisi hujumgha uchridi
ukrainaning xérson rayonigha jaylashqan we ruslar teripidin kontrol qiliniwatqan kaxowka su éléktristansisi bombardiman qilinip weyran qiliwétildi.
türkiye awazi radiyosi xewiri: ukraina armiyesi «jenubiy» rayonluq herbiy heriket qomandanliq ishtabi bayanatchisi wiladislaw nazarow ammiwi ortaqlishish tor bétidiki sehipiside élan qilghan bayanatida, rusiye armiyesining xérson rayonigha jaylashqan kaxowka su éléktr istansisini bombardiman qilghanliqini tekitlep mundaq dédi: «rusiye ishghaliyet armiyesi kaxowka su éléktr istansisini bombardiman qildi. weqedin kéyin, ziyanning derijisi, suning süriti we hejimi, yüz bergüsi kelkün apiti rayonliri éniqlinip, tégishlik xizmetler ishlenmekte, weziyet yéqindin közitilmekte.»
xérson rayonluq herbiy ishlar idarisining bashliqi aléksandir prokudinmu ammiwi ortaqlishish tor bétidiki sehipiside élan qilghan bayanatida, kelkün xewipige duch kelgen dnyépér deryasining ong qirghiqida yashawatqan kishilerning tarqaqlashturulidighanliqini eskertip mundaq dédi: «ishghaliyet astidiki deryaning sol qirghiqidiki kishilerni hazirche tarqaqlashturush mumkin emes.»
ukraina pirézidéntliq mehkimisi ishxanisining mesuli andréy yérmak ammiwi ortaqlishish tor bétidiki sehipiside kaxowka su éléktr istansisi heqqide bayanat élan qildi.
u pirézidént wolodimir zélénskiyning bu weqe toghriliq dölet bixeterlik we mudapie kéngishi bilen yighin chaqiridighanliqini bayan qilip mundaq dédi: «bu hujum eslide muhit qirghinchiliqidur. xérson rayonining jenubi we qirimdiki insanlarning ichimlik sudin mehrum qilinishi, bir qisim olturaq rayonlarning weyran bolushi we biyologiyelik muhitning buzulushigha ruslar jawabkar bolidu.»
ukraina pirézidénti wolodimir zélénskiy ammiwi ortaqlishish tor bétidiki sehipiside, bu heqte bayanat élan qilip mundaq dédi: «ruslar kaxowka su éléktr istansisi tosmisini buzup tashlidi. bu arqiliq ukraina zéminining her bir bulung-puchqaqliridin qoghlap chiqirilishi kéreklikini pütkül dunyagha ispatlidi. ulargha bir métir bolsimu zémin qaldurmasliq kérek. chünki ular her bir métir zémindin térrorluq üchün paydilanmaqta. peqet ukrainaning ghelbisila bixeterlikni eslige keltüridu, bu ghelibe choqum kélidu. térrorchilar ukrainagha su, bashqurulidighan bomba yaki bashqa nersiler bilen tosalghu bolalmaydu.»
yene bir tereptin, rusiye öz zéminigha qoshuwalghan nowaya kaxowka sheher bashliqi wladimir léyontyéw «riya nowosti» axbarat agéntliqigha bergen bayanatida, kaxowka su éléktr istansisining weyran bolushidin kéyin suning 2.5 métir örligenlikini, emma barliq mulazimetlerning toxtap qalmighanliqini ilgiri sürdi.
u yene, kaxowka su éléktr istansisi weyran bolghandin kéyin, yüz bergüsi kelkün xewipi sewebidin bezi rayonlarda tarqaqlashturush xizmitining ishlinish éhtimalliqining barliqinimu sözlirige ilawe qildi.
